Тинејџер се вакцинирал против желбата на својата мајка и сведочел пред американскиот Конгрес

Тинејџерот Итан Линдебергер повика на борба против лажните информации за вакцините пред Конгресот на САД, каде сведочеше за своето детство со мајка антиваксер. Тој успеал да се вакцинира откако побарал помош на интернет.

0
504

Осумнаесетгодишниот Итан Линденбергер од американската сојузна држава Охајо почнал да ги преиспитува антивакцинерските ставови на своите родители и на крајот, се вакцинирал против нивната волја и го привлекол вниманието на нациналните медиуми и Конгресот.

Тој раскажал пред Конгресот како успеал да се вакцинира и покрај противењето на неговата мајка.
„Израснав со верувањето на мајка ми дека вакцините се опасни, таа отворено зборуваше за нејзините гледишта и лично и онлајн“, вели Линденбергер.

Неговата мајка Џил Вилер, е дел од глобалното антиваксерско движење кое верува дека вакцините се опасни и предизвикуваат аутизам. Иако ваквото тврдење постојано се отфрла, голем број родители сѐ уште одбиваат да ги вакцинираат своите деца, а Светската здравствена организација извести дека инфекциите со сипаници се зголемени за околу 50 проценти во 2018 година.

„Тие сакаат да веруваш во тоа“

Линденбергер рече дека иако „љубовта, грижата и посветеноста на неговата мајка се очигледни“, таа била активна во антиваксерската онлајн заедница и ги базирала своите верувања врз анегдотални информации. „Луѓето не сакаат да ги сфатат информациите и податоците“, рече Линденбергер.

Тој раскажуваше како самиот почнал да ги истражува тврдењата на мајка си во научни списанија и во извештаи на Американскиот центар за контрола и превенција на болести. Тинејџерот постепено станал убеден дека треба да се вакцинира. Кога се обидел да разговара за тоа со мајка си, и ѝ објаснил дека вакцината ММР (против сипаници, рубеола и заушки) не предизвикува аутизам, таа му одговорила: „Тие сакаат да веруваш токму во тоа“.

Конечно, во ноември 2018, поставил прашање во онлајн дискусија на платформата Реддит: „Моите родители се малку глупави и не веруваат во вакцини. Сега, кога имам 18 години, каде да се вакцинирам?“

Следејќи ги инструкциите кои ги добил, тој го посетил локалното одделение на Министерството за здравство и примил вакцини за ММР и полиомиелитис, како и имунизација за хепатитис А и Б, грип, тетанус и други вируси.

Во меѓувреме, неговиот пост на Реддит станал вирален и го привлекол вниманието на медиумите, што довело и до неговото сведочење пред Конгресот. Во изјавата, Линденбергер повикува на спротивставување на антиваксерските страници кои шират теории на заговор. На тие информации, смета тој, треба да се одговори со лични приказни за смрт и болести предизвикани од невакцинирање.

„Кога ќе ги убедите родителите дека нивните деца се во голем ризик, тоа е далеку покорисен начин да ги натерате луѓето да го сменат мислењето“.

Данската студија која ги закопа заговорите

Мајката на Линденбергер не сведочеше пред Конгресот. Во изјава за АП таа рече дека е горда на синот, но и дека „не се согласува со ништо што рекол“.

„Го направија лик на фармацевтската индустрија“, изјави таа.

Во вторникот, дански научници предводени од епидемиологот Андерс Хвид ги објавија резултатите од студија за вакцините и аутизмот во која биле анализирани 650 илјади деца родени меѓу 1999 и 2010 година во Данска.
Истражувачите открија дека кај вакцинираните деца всушност имало далеку помалку болни од аутизам. Стапката на аутизам била за седум проценти повисока меѓу децата кои никогаш не примиле ММР вакцина, а кај децата кои воопшто не примиле никаква вакцина шансите да се разболат од аутизам пораснала за 17 проценти. Претходните студии веќе понудија можно објаснување за дискрепанцата, затоа што родителите на деца кои покажуваат симптоми на аутизам одбиваат целосно да ги вакцинираат своите деца.

Фото: Фејсбук

loading...