Децата со Даунов синдром и ретки болести чекаат подадена рака

0
1643

Поголема инклузивност и подобрувањето на образовните капацитети за децата со Даунов синдром и ретки болести побараа нивните родителите, кои денеска на прес-конференција ја најавија кампањата „Будење“.

Според Анче-Туфекчиева, мајка на дете со Даунов синдром и основач на здружението „Вера“ од Струмица, мајките имаат желба да ги покажат своите деца на јавноста и да се горедеат со нив, но, како што рече, тоа не се случува и кај родителите кои имаат дете со пречки во развојот.

– Лицата со пречки во развојот се меѓу сите нас и треба да ги прифатиме. Како мајка на дете со посебни потреби не сакам да ме сожалуваат или да го прифатите тоа дека сме тука за да ги покажеме децата. Сакаме да ги прифатите децата со посебни потреби, бидејќи тие според конвенцијата на ОН за човекови права треба да ги ужуваат сите права како останатите деца – истакна Туфекчиева.

Побара сите општини да го следат примерот на општина Струмица каде во училиштата и градинките имаат дефектолог и психолог кои работат и им помагаат на децата со посебни потреби, со цел, како што рече да им се олесни и на родителите кои мораат да бидат дома и да го чуваат детето.

Даниела Мирческа, мајка на дете со ретка болест, од Ресурсниот Центар на родители појасни дека родителите на децата со посебни потреби се луѓе кои, како што рече, секогаш знаат се.

– Секогаш знаат да ја препознаат болката, знаат да се радуваат на малите подвизи на нивните деца, како и на подвизите на туѓите деца, секогаш мораат да знаат се и да бидат спремни неколку чекори пред другите фактори што се вклучени во животот на нивните деца и нивното подигнување – рече Мирческа.

Ивана Хаџиевска, социолог и медиумски соработник нагласи дека потребно е и јавните личности да зборуваат погласно и почесто да се борат за правата на лицата со нетипичен развој.

– Во Македонија и понатаму се води битка за лицата со прекин во развојот да бидат третирани исто како оние со типичен развој. Едно на 700 деца се раѓа со Даунов синдом. Прашањето е што кога едно вакво дете ќе се роди, и што можеме ние да му овозможиме. Она што мора да се направи е повеќе напор на општеството и државата, и да им помогне на овие деца. Крајната цел е тие да се осамостојат и да се грижат за себе – порача Хаџиевска.

Според неа, честите стереотипи дека овие лица не можат да работат или да учат не се точни. Тие, како што рече, можеби малку побавно но сепак ги постигнуваат резултатите. Нагласи дека и тие треба да имаат социјален живот.

Родителите се осврнаа на моменталните прилики за децата и лицата со попреченост, и промените што се неопходни за, како што велат, да се разбуди општеството и да ги прифати лицата со попреченост, да ги препознаваат нивните способности и да ги афирмираат како рамноправни членови на заедницата.

Извор: МИА

loading...