Контролирајте ја висината на вашето дете барем два пати годишно!

Здружението „РАСТ“ апелираше до надлежните институции и до менаџментот на Детската клиника да обезбедат недискриминаторски третман за сите деца на кои им е потребна хормонска терапија

0
566

„Терапијата на децата со проблеми во растот зависи од тендерските постапки и многу е веројатно дека една група од 20 деца наскоро може да остане без својата хормонска терапија за раст, а тоа не смее да се случува“ – рече Александар Петровски, претседател на Здружението на родители на деца со ендокринолошки заболувања – Раст на денешната прес конференција по повод одбележувањето на Светскиот ден за подигнување на свесноста  за растот кај децата.

Под МОТОТО: Кога зборуваме за Висината, зборуваме за Здравјето денеска ова здружение по четврти пат ѝ се придружи на глобалната иницијатива.

„Светското искуство говори дека децата со нарушувања на растот се соочуваат со сериозен проблем, а тоа е доцната дијагноза и последователно ненавременото лекување кое доведува до сериозни последици кои не се само индивидуален, туку се проблем на целиот систем.

Кај нас, децата со ваков проблем очекуваат кога ќе се ослободи место од постоечките деца на терапија за да започнат со своето лекување и времето на чекање е различно долго. Специјалистите можат повеќе да зборуваат од стручен асект, но знаеме дека најдобри резултати од лекувањето се постигнуваат кога дијагнозата ќе се постави навремено и кога соодветно ќе се започне со терапија во раните годините од претшколска возраст, континуирано без промена и без ден пауза. Зошто децата со нарушувања на растот треба да се лекуваат? Дали можеби знаете дека овие деца како возрасни доколку не се лекуваат имаат зголемена појава на срцеви заболувања и заболувања на кардиоваскуларниот систем, мозочни удари, депресија, зголемена телесна тежина со сите последици кои ги носи…. итн.? Нашата порака до Здравствените власти: Сите деца се еднакви, и не смееме да правиме дискриминација….едни добиваат право да бидат корисни и активни партиципанти во заедницата , а другите се казнети да се носат со сите физички видливи и системски проблеми од нелекувано нарушување на растот. Токму тоа е пораката на нашите постери оваа година…..Сите лица на децата треба подеднакво да бидат обоени со насмевка и боја на перспектива…. левата страна на постерот да биде помала, додека десната, убава….. весела, колоритна да биде поголема“, рече Петровски.

Тој им порача на родителите, старателите, бабите, дедовците: „Контролирајте ја висината на вашето дете барем два пати годишно. Контрола на висината не значи детето да биде измерено и да добиете нумерички број. Барајте од матичните педијатри и семејни лекари бројот од добиените сантиметри да го внесат во табелата со крива која покажува каде е висината на вашето дете во однос на очекуваната нормална висина за неговата возраст. Раните знаци можете и вие како родители и старатели да ги процените едноставно и сами. Пример доколку забележите дека детето носи ист број на облека подолго од една година, пониско е од неговите врсници, децата на помала возраст од помалите групи или одделенија го надминуваат со висината…… консултирајте лекар“, рече тој.

На одбележувањето на настанот се обрати и заменик министерот за здравство Гоце Чакаровски кој рече дека ќе се заложи за ист и недискриминаторски третман на сите деца со овој проблем и порача дека останува отворен за соработка и во иднина, а не само на денешниот ден.

„Не сум видел поголем човек во помало пакување од господинот Александар“, рече Злате Мехмедови, директор на Здравствениот дом Скопје кој потенцираше дека децата со проблеми немаат само естетски проблем, туку тие проблеми се показател за целокупното здравје.

„Во Република Македонија во моментов има околу 100 деца со нарушувања на растот, сите хормони се ги имаме и сите деца се ставени на соодветната терапија“, рече во своето обраќање докторката Елена Шукаровска, како претставник од Детската клиника. Таа апелираше да се воведе нова практика со која во здравствената книшка на секое дете ќе биде застапена перцептилна крива која е важен параметар за навремено откривање на овие проблеми.

На Плоштадот Македонија беше организирано бесплатно мерење на висината и тежината на сите дечиња кои имаа желба да проверат дали нивната висина е соодветна за возраста.

Д.Х.

ОСТАВЕТЕ ОДГОВОР

Please enter your comment!
Please enter your name here