Од гумени, дрвени, плишани, па сè до играчки што работат на батерии што пеат, играат, светат и се движат. Како да ги изберете најдобрите за вашето дете? И колку играчки треба да има вашето дете?
На децата не им требаат еден куп играчки. Напротив, на нивниот нервен систем му е потребна помалку стимулација за обработка.
Во една студија, малите деца на кои им биле дадени само неколку играчки играле подолго, покреативно и со подлабока концентрација од децата кои биле опкружени со голем број избори.
Нивниот нежен нервен систем всушност, моли за помалку избори, помалку визуелен шум, потивка соба за играње и побавно темпо.
Децата кои имаат многу играчки подоцна тешко играат без вклучен екран, велат „досадно ми е“ по 30 секунди, одат од играчка до играчка без воопшто да се заиграат.
Секако, пред сè е важно играчките што ги избирате да бидат безбедни за вашето дете и соодветни на возраста. Но, тоа не се единствените критериуми при изборот на играчки.
Дали треба да избегнувате играчки што работат на батерии?
Играчките што работат на батерии се генерално оние што се позабавни, а помалку едукативни. Тие често се играчки што пеат или испуштаат други звуци, светат или трепкаат. Кога е ова проблем и зошто?
Секој период од растот на детето може да биде придружен со одредени играчки што ќе им бидат интересни на малите во зависност од нивната возраст. Исто така е познато дека играчките играат голема улога во правилниот психофизички развој на детето и се еден од клучните фактори во учењето и стекнувањето нови знаења, особено во најраниот период на децата.
Затоа е важно какви играчки ќе му дадете на вашето дете да си игра. Па, како да изберете и што треба да се избегнува во раните години на децата?
Зошто електричните играчки не се препорачуваат за мали деца?
Играчките што работат на батерии поттикнуваат пасивна игра кај малите деца, односно – децата притискаат копче и чекаат да се случи нешто што ќе им биде забавно.
Голем број играчки што играат и испуштаат некои звуци нема да го поттикнат детето да учи говор, а често се случува во присуство на такви играчки дури и родителите да зборуваат помалку – бидејќи нема потреба да се забавуваат децата со нивните гласови и пеење (а еден од најдобрите начини детето да научи говор е со слушање пеење).
Кои играчки се препорачуваат за најраниот период на децата?
Освен што се безбедни за употреба и не предизвикуваат повреда на детето (што значи дека се направени од соодветни материјали и форми), важно е играчките со кои ги опкружувате вашите деца да бидат такви што поттикнуваат игра и размислување. Затоа препорачуваме коцки и топчиња во различни бои, едноставни форми на играчки што претставуваат животни и растенија, различни форми што можат да се вметнат низ соодветни отвори, помали и поголеми чаши што можат да се користат за изградба на високи кули и слично.
Колку е поедноставна играчката, толку е поголема шансата таа да го активира она што е потребно кај детето – имагинација и интерес. На овој начин, се совладуваат нови вештини што се потребни за играње, а кои претставуваат чекор во развојот.
Важно е да ги следите интересите и способностите на вашето дете и соодветно да ги избирате играчките. Некои деца се повеќе заинтересирани за вежбање на фини моторни вештини – додека други треба да бидат охрабрени да го прават тоа, некои деца претпочитаат да вклопат различни форми за да направат нова фигура, додека некои деца се наоѓаат во активности како што се фрлање топки, туркање возила или едноставно – редење коцки.