Повеќе од две третини од децата и младите (74%) имаат профил на некоја социјална мрежа.
Дури 41% од децата на возраст од 9 до 10 години и 72% од оние на возраст од 11 до 12 години признаваат дека имаат свој профил, иако минималната возраст за отворање сметка на повеќето социјални мрежи е 13 години.
Денес, децата сé порано и порано почнуваат да користат дигитални уреди, а генерациите кои растат во дигиталната ера уживаат бројни предности што им ги носи Интернетот.
Но, со сите овие предности, постојат и одредени ризици.
Во дигиталниот свет, исто како и во реалниот свет, младите луѓе можат да бидат изложени на различни форми на насилство. Овој тип на насилство се нарекува дигитално, онлајн или сајбер насилство.
Како да препознаете дека детето доживува сајбер-насилство?
Постојат неколку знаци на кои родителите треба да обрнат внимание за да ги препознаат можните проблеми со кои се соочува нивното дете на Интернет.
Необјасниви физички промени
Многу е важно да следите како се однесува детето и да разговарате со него.
Одвојте неколку минути секој ден за да разговарате со вашето дете и да забележите какви било ментални или физички промени.
Ако детето одеднаш ослабне или се здебели, важно е отворено да разговарате со него и да го прашате што го мачи.
Како и возрасните, кога се под голем стрес децата често доживуваат физички промени – без разлика дали нагло губат или добиваат тежина, обидувајќи се да ги скријат своите вистински чувства.
Ненадејни промени во расположението
Кога станува збор за тинејџерите, наглите промени во расположението често се поврзуваат со пубертетот. Сепак, не треба да ги игнорирате овие промени доколку траат со денови и стануваат поизразени.
Честите промени во расположението или кратки, брзи одговори може да бидат знак дека нешто сериозно се случува во животот на вашето дете.
Губење на интерес за активности
Кога детето одеднаш почнува да се повлекува од општеството, избегнува активности кои претходно му биле омилени и се дистанцира од вас, тоа може да биде знак дека се соочува со проблеми со кои не знае како да се справи.
Напуштање на социјалните мрежи
Обрнете посебно внимание на овој знак. Во денешно време речиси сите деца имаат смартфони и профили на социјалните мрежи, па сосема е необично ако детето одеднаш реши да ги напушти социјалните мрежи.
Иако понекогаш им треба само одмор од интернетот, дефинитивно е важно да разговарате со детето и да ја дознаете вистинската причина поради која решило да „исчезне“ од социјалните мрежи.