Откако минатата година ја забрани употребата на мобилни телефони во основните училишта, италијанскиот министер за образование и заслуги, Џузепе Валдитара, ја проширил забраната и на средните училишта и сите стручни и технички институти.
Тој испратил известување до сите средни училишта во Италија дека употребата на мобилни телефони на часовите во средните училишта ќе биде забранета од следната учебна година. Оваа одредба се базира на онаа од 11 јули 2024 година, кога е воведена забрана за телефони во основните училишта за време на часовите.
„Интервенцијата е неизбежна“, велат официјалните лица
„Оваа интервенција е неизбежна поради големите негативни ефекти од прекумерната и неправилна употреба на паметни телефони. Тие негативно влијаат на здравјето и благосостојбата на адолесцентите, како и на нивните академски перформанси“, рекол министерот, додавајќи дека многу научни студии укажуваат на опасностите од прекумерна употреба на мобилни телефони, како што се оние што ги спроведуваат СЗО и Италијанскиот институт за здравство.
Во известувањето испратено до училиштата, министерот бара од институциите да „ги ажурираат своите прописи и пактот за образовна одговорност, кој им забранува на учениците од средно училиште да користат паметни телефони за време на часовите, вклучително и за наставни цели, како и специфични дисциплински санкции за оние кои ја прекршуваат оваа забрана“.
Училиштата ќе мора да најдат начин да ја спроведат забраната, вклучително и прибегнување кон специфични дисциплински санкции, се наведува во циркуларот. Со оглед на распространетоста на употребата на паметни телефони кај девојчињата и момчињата, веројатно е дека спроведувањето на забраната ќе зависи повеќе од волјата и чувствителноста на наставниците, како и од тоа како секоја институција успева да се организира.
Забраната ќе важи во текот на сите наставни часови. Единствени исклучоци се случаите во кои употребата на паметни телефони е предвидена во персонализирани образовни планови за ученици со развојни попречености, лица со попреченост и на часови по компјутерски науки и телекомуникации.
Министерот Валдитара, исто така, потсетува дека поднел барање до Советот за образование на Европската Унија на 12 мај оваа година, препорачувајќи забрана за мобилни телефони во училиштата во сите земји од Европската Унија. Франција воведе таков закон во 2018 година, додека во Холандија е во сила од 1 јануари 2024 година.
Финска и Шведска исто така неодамна го ограничија користењето на мобилни телефони, а за оваа забрана се дискутира во Белгија, Португалија и Шпанија.
„Неопходно е да се зајакнат активностите насочени кон едукација за одговорно и свесно користење на паметни телефони и други дигитални алатки. Значително внимание мора да се посвети и на прашањата поврзани со ширењето на вештачката интелигенција, вклучително и нејзината употреба во наставните активности и процесите на учење, со цел да се промовира нејзината ефикасна употреба“, објаснил министерот Валдитара.
Колку се штетни мобилните телефони за новите генерации?
Американскиот психолог Џонатан Хејт, кој предава социјална психологија на „Stern School of business“ во Њујорк, објави книга со наслов The anxious generation: How the great rewiring of childhood is causing an epidemic of mental illness („Анксиозната генерација: Како големото преобликување на детството предизвикува епидемија на ментални болести“), во која тој ја проширува тезата по која е исклучително познат меѓу експертите.
Постои значајна корелација помеѓу употребата на паметни телефони и социјалните медиуми, од почетокот на 2010-тите па наваму, и прогресивното зголемување на нивоата на депресија, анксиозност и самоповредување кај адолесцентите. Неговата книга повторно ја разгоре дискусијата за тоа колку се штетни мобилните телефони за новите генерации.