Канадската брачна двојка Идит Лемеј и Себастијан Пелетие имаат четири деца, од кои три ќе го загубат видот поради генетско нарушување. Целта на нивните родители сега е да го истражат целиот свет со нив и да видат сè што можат со свои очи, пред да ја изгубат таа можност.
На нивното најстаро дете, Миа, ѝ била дијагностицирана ретката дегенеративна болест ретинитис пигментоза – генетско нарушување кое постепено води до губење на видот.
Набрзо и на двајца од синовите им била дијагностицирана истата состојба.
„Не можеме многу да направиме“, вели Идит Лемеј, додавајќи дека не постои лек или ефикасен третман за да се забави прогресијата на болеста.
„Не знаеме колку брзо ќе напредува, но очекуваме до средината на нивните животи да бидат целосно слепи“, објаснува мајката.
Кога се соочиле со катастрофалните вести, парот се фокусирал да им помогне на своите деца да научат вештини кои ќе им помогнат полесно да се снајдат во животот откако ќе го изгубат видот.
„Помисливме: Нема да им го покажеме слонот во книгата. Ќе ги однесеме да видат вистински слон. И да им го исполниме сеќавањето со најдобрите и најубавите сцени што можеме“, нагласува Идит Лемеј.
Набрзо испланирале да заминат на едногодишно патување околу светот со своите деца.
„Со дијагнозата на болеста сега треба да побрзаме. Нема ништо подобро од патување. И не само да се видат природните убавини, туку да се искусат и други култури и луѓе“, вели таткото.
Набрзо почнале да собираат пари, а нивниот фонд за патувањето добил убав бонус кога Себастијан ги продал акциите што ги добил од компанијата во која работи.
„Тоа беше како животен подарок. Повелете пари за вашето патување“, вели Идит.