Водечките лекари за деца се приклучија на повиците за целосна забрана за физичко казнување на децата во Англија, нагласувајќи дека нема докази дека оваа практика има позитивен ефект врз нивната благосостојба. Во моментов, удирањето деца е незаконско во Англија, освен ако тоа не се смета за „разумна казна“.
Но, Кралскиот колеџ за педијатрија и детско здравје (RCPCH) сега сака да го отстрани тој правен исклучок преку промена на законот што моментално е во парламентарна постапка.
Министерството за образование вели дека владата не планира да го промени законот за физичко казнување, но останува посветена на тоа секое дете да има најдобар можен почеток во животот. Проф. Ендру Роуланд, претставник за заштита на децата на RCPCH, вели: „Време е оваа казна од викторијанската ера да биде предадена на историјата“.
Доколку доволно пратеници го поддржат амандманот на Законот за заштита на децата и училиштата, предложен во јануари од пратеникот од Лабуристичката партија Џес Асато, оправдувањето на физичкото казнување како „разумна казна“ ќе биде целосно укината во Англија.
Во моментов, правилата за физичко казнување на децата се разликуваат во Велика Британија.
Во Шкотска и Велс, физичкото казнување е веќе забрането, додека во Англија и Северна Ирска сè уште постои законски исклучок за „разумна казна“. Во Англија, оваа одредба беше вклучена во Законот за деца од 2004 година, но физичкото казнување на децата е дозволено уште од 1860 година.
Шкотска прва во Велика Британија го забрани физичкото казнување во ноември 2020 година, а Велс ја следеше во март 2022 година.
Проф. Роуланд истакнува дека 67 земји во светот веќе го забранија физичкото казнување на децата, додека уште 20 планираат да го сторат истото.
Владата соопшти дека „внимателно ги следи“ промените во Шкотска и Велс, но засега нема намера да го менува законот.
Портпаролот на владата вели дека предложениот закон ја претставува „најголемата реформа во заштитата на децата во последните децении“ и дека владата ставила приоритет на реформата на системот за социјална заштита за да се подобри детската заштита и да се зајакне соработката меѓу образованието, здравството и социјалните услуги.
Родителите од групата за сензорни игри за бебиња во Сејл, (Greater Manchester), изјавиле за Би-Би-Си дека сите се против физичкото казнување на децата, но некои се неодлучни околу тоа дали владата треба да донесе такви закони.
Мајката Лин Кејси верува дека родителите „треба да можат да ги дисциплинираат децата како што им одговара“, но додава: „Не поддржувам физичко казнување на децата, па ако е потребна забрана, тогаш го поддржувам тоа“.
Таткото Оли Харисон вели дека никогаш не би се мешал во родителските методи на други родители, но мисли дека забраната „најверојатно би била корисна“ бидејќи ќе ја отстрани легалната сива зона.
Проф. Роуланд истакнува дека физичкото казнување „несомнено му штети на здравјето на децата“ и дека ниту една научна студија не нашла докази за позитивните ефекти на физичкото казнување врз добросостојбата на децата.
По трагичниот случај на десетгодишната Сара Шариф се интензивираа повиците за забрана на физичкото казнување.
Сара беше убиена во август 2023 година по две години „тортура“ од страна на нејзиниот татко и маќеа.
Нејзиниот татко, кој по злосторствотото побегнал во Пакистан, повикал англиска полиција и тврдел дека „законски ја казнил“ Сара пред нејзината смрт.
Во Англија веќе е незаконски да се нанесува вистинска или тешка телесна повреда на дете, како и да се има суров однос кон дете, но проф. Роуланд забележува дека истражувањата покажуваат дека децата кои се физички казнувани имаат поголема веројатност да доживеат сериозно физичко насилство.
Целосната забрана за физичко казнување, вели тој, ќе им помогне на властите да повлечат јасна линија и да испратат порака дека физичкото казнување на децата „никогаш и под никакви околности не е законско“.
Нацрт-законот беше поддржан и од други организации, вклучувајќи го и Националното друштво за спречување на суровост кон децата (NSPCC).
Џоана Барет од NSPCC предупредува дека физичкото казнување е поврзано со „депресија, анксиозност, зголемена агресија и асоцијално однесување“ и дека итно се потребни законски промени.
„Знаеме дека физичкото казнување сè уште е дел од детството на премногу деца во Англија“, вели таа.
Но, не се согласуваат сите.
Сајмон Калверт од кампањата „Биди разумен“ изјавил за BBC Radio 5 Live дека лекарите одат предалеку со нивните барања.
Тој смета дека „неразумната казна“, како што е физичкото малтретирање на дете, е веќе незаконска и изразува загриженост дека новиот закон може да доведе до тоа родителите да бидат кривично гонети дури и за најмали физички корекции, како што е лесно тапкање по раката.
Лин Пери, извршен директор на добротворната организација Barnardo’s, заклучува: „Ниту еден облик на насилство врз децата не е прифатлив“. А сепак, децата сè уште имаат помала правна заштита од физички напад отколку возрасните“.