Веста за новото истражување спроведено од култниот производител на детски играчки – LEGO го обиколи светот. Според резултатите од истражувањето, дури три пати повеќе деца денес го наведуваат влогирањето како кариера од соништата во споредба со работата на астронаут. Истражувањето е спроведено во САД, Велика Британија и Кина на примерок од 3.000 деца на возраст од 8 до 12 години и 326 родители.
Според него, денес повеќето деца го наведуваат влогирањето како кариера од соништата, додека работата на астронаут станала апсолутно неинтересна. Поточно, една третина од децата изјавиле дека сакаат да бидат јутјубери кога ќе пораснат, додека само 11% од нив изјавиле дека сакаат да бидат астронаути. Интересно е да се истакне дека одговорите во голема мера зависеле од земјата од која доаѓа детето. Така, повеќе од половина од Кинезите сакале да станат астронаути и токму оваа професија била најпривлечна за нив. Следувале работата наставник, музичар и професионален спортист, додека работата на влогер е на петтото место.
Од друга страна, децата од САД и Велика Британија би сакале да заработуваат за живот преку влогирање, а потоа следуваат професиите: наставник, професионален спортист, музичар и, конечно, астронаут.
Разликите меѓу аспирациите на децата израснати во различни делови на светот не се рефлектираат само во изборот на идните професии. Имено, три од четири деца рекле дека веруваат во изјавата дека луѓето во иднина ќе живеат на друга планета; кај Кинезите процентот на согласност со оваа изјава се искачува на 96%, додека во Велика Британија е 63%, а во САД 68%.
Треба да се спомене и истражувањето за тоа што сакаат да станат децата кога ќе пораснат, што го спроведе Fatherly во 2017 година. Наместо влогирање, тогаш, мнозинството од 1.000 деца под 12-годишна возраст анкетирани во САД изјавиле дека нивната кариера од соништата била да бидат лекари. Потоа следувале работните места ветеринар, инженер, полицаец и учител.