За овој редок, спорорастечки серозен рак на јајници од низок степен, кој е позитивен на KRAS мутација, Американската администрација за храна и лекови (FDA) одобри нова комбинација на лекови за орална употреба.
Редок вид рак кој тешко се лекува и слабо реагира на стандардни терапии
Новата комбинација на лекови, која веќе се користи и за рак на усната празнина, доби забрзано одобрување од FDA откако клиничките испитувања покажаа значително и долготрајно олеснување за пациентите со редок рак на јајници кој не реагира добро на вообичаените терапии. Ова е првиот и единствен лек кој FDA го одобрила за серозен рак на јајници од низок степен со позитивна KRAS мутација.
Терапијата вклучува два лека: авутометиниб и дефактиниб и се продава под заедничкиот назив Avmapki Fakzynja Co-Pack. Лекот е наменет за возрасни пациенти кои веќе пробале други третмани.
LGSOC погодува околу 80.000 жени ширум светот, особено во дваесеттите и триесеттите години, или во 50-тите и 60-тите. Околу 30% од случаите вклучуваат мутација во KRAS генот, која го поттикнува растот на ракот. Болеста е тешко излечива, слабо реагира на стандардни терапии и има тенденција да се враќа. Иако жените можат да живеат и до 10 години со LGSOC, болеста значително влијае врз физичкото и менталното здравје, плодноста и квалитетот на живот.
Како делува новата терапија за редок рак на јајници
Одлуката на FDA се темели на клиничко испитување во кое учествувале 57 пациенти со повратен серозен рак на јајници од низок степен со позитивна KRAS мутација. Сите примиле барем еден претходен третман. Пациентите примале орални дози на авутометиниб двапати неделно и дефактиниб двапати дневно во текот на првите три недели од секој четиринеделен циклус, продолжувајќи сè до прогресија на ракот или појава на сериозни несакани ефекти. Резултатите покажале дека туморот се намалил кај 44% од пациентите, со одговор кој траел од 3,3 до 31,1 месец.
Комбинацијата на лековите делува така што ги блокира протеините кои го поттикнуваат растот на ракот и отпорноста на терапија. Авутометиниб го блокира протеинот наречен MEK, но кога овој протеин е блокиран, друг протеин наречен FAK може да стане поактивен. Тука стапува во функција дефактиниб, кој го блокира FAK протеинот за да го спречи враќањето на ракот. Во текот на секој четиринеделен циклус, пациентите земаат Avmapki двапати неделно и Fakzynja двапати дневно во три недели, сè додека третманот има ефект и несаканите ефекти се подносливи.
Кои се несаканите ефекти на новата терапија?
Најчестите несакани ефекти вклучуваат:
- мачнина
- повраќање
- дијареа
- болка во стомакот
- лошо варење
- запек
- рани во устата
- чешање
- замор
- осип
- сува или кожа која чеша
- болки во мускулите или зглобовите
- оток
- промени во крвната слика (зголемени нивоа на ензими од црниот дроб и билирубин, низок хемоглобин и број на крвни зрнца)
- проблеми со очите
- отежнато дишење
- кашлица
- уринарни инфекции
Според информациите за безбедност од производителот, лекарите мора да ги советуваат пациентите за користење ефикасна контрацепција за време на терапијата, бидејќи новиот третман може да му наштети на фетусот доколку жената забремени. Пациентите ќе бидат следени и за функцијата на црниот дроб, токсичност на кожата, заболувања на мускулите (рабдомиолиза) и проблеми со видот за време на лекувањето.