Наоѓањето на една единствена причина зошто луѓето изневеруваат е речиси невозможно. Причините се движат од неисполнети потреби преку импулсивни одлуки до осаменост и можности, што сме ги виделе сите.
Сепак, познатата психотерапевтка и авторка на книгите „Парови во заробеништво“ (Mating in Captivity) и „Неверство“ (A State of Affairs), Естер Перел, спровела обемно истражување и нашла еден мотив кој постојано се појавува.
Таа го нарекува „мртвило“ (deadness).
Што е „мртвило“?
Иако звучи драматично, всушност опишува мирна состојба која се провлекува во многу долготрајни врски: чувство на емоционална затапеност, дистанца и внатрешна празнина.
Може да изгледа како:
дека сте повеќе пријатели отколку љубовници,
дека вашиот сопствен живот ви станал здодевен,
дека сте исцрпени од улоги како „родител“, „организатор“ или „миротворец“,
дека сте го изгубиле контактот со интимноста, спонтаноста или еротската енергија.
Сè уште го сакате вашиот партнер, но ве мачи чувството дека нешто недостасува.
Каква врска има „мртвилото“ со изневерувањето?
Истражувањето и искуството на Естер Перел покажуваат дека повеќето луѓе не изневеруваат затоа што сакаат да го повредат својот партнер, ниту нужно затоа што се заљубиле во некој друг.
Тие често изневеруваат затоа што сакаат повторно да се чувствуваат живи.
Изневерувањето станува бегство, обид за враќање на чувството за личен идентитет и страст, еден вид „воскресение на себеси“. Но, во исто време, тоа е и начин да се одвлече вниманието од вистинските проблеми во врската.
Може ли да се избегне „мртвило“?
Добрата вест е – „мртвилото“ не значи дека врската е завршена. Тоа значи дека бара свесен напор.
Еве неколку начини да внесете живот во вашата врска:
- Дајте приоритет на емоционалната и еротската возбуда.
Продолжете да излегувате еден со друг и бидете љубопитни.
Ако секој викенд изгледа исто, од врската исчезнуваат изненадувањето, мистеријата и разиграноста.
Направете мали промени во вашата рутина: пробајте нови рецепти, организирајте спонтан состанок, изненадете се еден со друг со ситници.
- Прво сакајте се себеси.
Ако чувствувате дека сте ја изгубиле вашата креативност, независност или индивидуалност во вашата врска, време е да ги вратите. Поставете граници.
Одвојте време за себе – без да се чувствувате виновни. Потсетете се на она што ве прави среќни и свесно дајте си го.
- Зборувајте за досадата и дистанцата.
Избегнувањето само ја храни досадата.
Интимноста расте кога искрено споделувате дека се чувствувате затапено или заглавено – без да обвинувате. Токму таквите разговори често ја отвораат вратата за повторно поврзување.
Кога „мртвилото“ значи крај?
Не секоја врска може да се спаси.
Ако мртвилото е одраз на подлабоки некомпатибилности, потиснат гнев или ако напорите за поправање на работите се дочекани со рамнодушност – можеби е време да ја завршите.
Исто така, ако довербата е постојано нарушена и нема преземање одговорност и промена на однесувањето, тогаш тоа е знак дека „оживувањето“ е завршено.
Што друго треба да знаеме?
Изневерувањето не е секогаш црно-бело и не мора да значи крај на врската.
Како што вели Естер Перел: „Кога го бараме погледот на друг, не секогаш се свртуваме од нашиот партнер – туку од личноста во која самите сме се претвориле.“
Мртвилото е пречка. Можете да го прифатите или да му се спротивстваите.
Тоа не значи дека љубовта исчезнала – тоа значи дека виталноста на врската треба да се обнови.