Нарушувањето од аутистичниот спектар е едно од најчестите невро-развојни нарушувања. Во повеќето случаи, на лицето му се дијагностицира аутизам во детството, обично по четиригодишна возраст.
Сепак, некои возрасни живеат со недијагностициран аутизам, дури и оние со потешки симптоми.
Симптомите на аутизам кај возрасните може да се разликуваат од симптомите кај децата. Многу возрасни учат да живеат со нивните симптоми со текот на годините.
Добивањето дијагноза дури и подоцна во животот може да биде корисно од повеќе причини, но особено затоа што може да им обезбеди на луѓето подобар пристап до услуги и поддршка.
Светскиот ден за подигање на свеста за аутизмот се одбележува секоја година на 2 април од страна на Обединетите нации, додека во некои земји, целиот месец април е посветен на подигање на свеста за нарушувањата од спектарот на аутизмот.
Недостаток на поддршка
Искуството покажува дека системот сè уште не ги препознава доволно потребите на лицата со нарушувања од аутистичниот спектар и нивните семејства. Недостигот од системска поддршка е видлив во сите сегменти – од дијагностика и рана интервенција, образование, вработување, до долгорочна грижа за возрасните лица со аутизам.
Лицата со нарушување од аутистичен спектар имаат право на самоопределување, независност и автономија, како и право на здравствена и социјална заштита, образование и вработување на еднаква основа со другите. Тие не смеат да се соочат со дискриминација кога бараат медицинска нега и мора да продолжат да имаат пристап до системите за поддршка што им се потребни за да останат во своите домови и заедници наместо да се соочат со можноста за присилна институционализација.
Состојбата на возрасните со аутизам, особено на оние над 21 година со повисоко ниво на потреби за поддршка, е особено загрижувачка, бидејќи тие бараат интензивна поддршка која не е достапна преку постоечкиот систем. Нивните родители, често исцрпени од долгогодишната борба, сè почесто не можат да им ја пружат потребната нега поради старост и болест.
Симптоми
Воспоставувањето на социјални интеракции претставува предизвик за лицата со аутизам.
Тие може да имаат потешкотии во односите, како и да ги разберат туѓите емоции. Исто така, може да имаат нефлексибилни шеми на размислување и однесување, па често вршат повторувачки дејства.
Возрасните со благи симптоми на аутизам честопати никогаш не добиваат дијагноза, пренесува Medical News Today.
Вообичаени знаци и симптоми на аутизам кај возрасните може да вклучуваат:
несмасност
тешкотии во водење разговори
тешкотии во воспоставувањето или одржувањето блиски пријателства
непријатност при контакт со очите
тешкотии во контролирањето на емоциите
силен интерес за една одредена тема
чести монолози за иста тема или предмети
преосетливост на звуци или мириси кои, се чини, не им сметаат на другите
неволни звуци, како што се повторено чистење на грлото
тешкотии при разбирањето на сарказам
интерес за само неколку активности
склоност кон осамени активности
проблеми со препознавање на емоциите на другите
проблеми со разбирање на изразите на лицето и говорот на телото
потпирање на секојдневните рутини и тешкотии доколку таа рутина се наруши
повторувачки однесувања
супериорни способности во математиката и сродните дисциплини (во некои случаи)
потреба да се распоредат предметите по одреден редослед.
На жените е потешко да им се постави дијагноза
Аутистите обично ги немаат сите знаци и симптоми наведени погоре, а може да имаат и други кои не се на списокот. Знаците и симптомите варираат од личност до личност.
Исто така, симптомите може да се разликуваат помеѓу мажите и жените. Жените со аутизам можат подобро да се справат во социјалните ситуации од мажите со аутизам.
Како резултат на тоа, дијагностицирањето на аутизмот кај жените може да биде поголем предизвик. Според некои истражувања, луѓето со аутизам имаат поголема веројатност да страдаат од други состојби како анксиозност или депресија во споредба со општата популација.