Паметните часовници и апликациите што го следат вашиот дневен фитнес напредок станаа норма за многу луѓе. Не оптоваруваат со податоци за бројот на чекори, квалитетот на спиењето, отчукувањата на срцето, потрошувачката на калории… но дали знаете што всушност треба да следите и кои статистики се навистина важни за да не стане сè премногу стресно?
Може да биде тешко да се обработат сите информации што доаѓаат од часовниците.
„Во нашата работа го намаливме бројот на чекори како важна метрика“, рекол д-р Дејвид Конрој, професор по применета наука за вежбање на Универзитетот во Мичиген и истражувач за следење на телесната активност.
Освен ако не работите според одредена цел за здравје или фитнес, броењето чекори навистина се издвојува меѓу останатите за севкупната благосостојба и долговечноста, како што покажуваат се повеќе истражувања, пишува WebMD.
Најголемата студија, на Универзитетот Џон Хопкинс, Универзитетот во Минесота и Универзитетот во Колорадо, ги прочешлала бројките во Националното истражување за здравјето и исхраната (NHANES). Тие споредиле 15 маркери кои влијаат на долговечноста, а движењето било над сите други мерења. Ова ги вклучува предикторите како возраста, полот, расата, животните навики и многу повеќе.
Активноста е мерка која лесно се менува, додека некои други не, рекла д-р Ерја Куи, доцент на Универзитетот во Минесота и еден од коавторите на студијата.
Како да се поедностави броењето чекори
За повеќето луѓе, движењето на нозете е и натаму најлесниот фактор за следење. Но, експертите предупредуваат дека овие уреди создале замка бидејќи луѓето сакаат едноставен одговор – дали се движам доволно?
Тоа прашање е потешко да се одговори отколку што мислите. Со децении, целта беше 10.000 чекори на ден – но понатамошните истражувања покажале дека броењето чекори дури и од 2.500, сè уште носи долгорочни здравствени придобивки кои се зголемуваат како што се зголемува бројот на чекори – дури и после 10.000.
Заклучокот е дека движењето повеќе е подобро за нас и служи како најдобра мерка за долговечност. Д-р Куи истакнал дека нашата цел треба да биде да имаме што повеќе движење секој ден – и која било бројка на чекори е подобра од ниеден чекор.
Немањето уред за следење не е проблем, се додека се движите и имате општа претстава за времето и растојанието. Може да биде дека водењето дневник на вашите активности обезбедува подеднакво добри мерења на движењето, рекол Конрој.
Зошто? Кога рачно го следите вашето движење, во него вложувате мисли и размислување. Овој процес ви овозможува да размислите како сте се движеле, колку долго и каде, што ви дава можност да размислите што функционира, а што не.
Кога би имале лек кој може позитивно да влијае на исто толку различни системи во телото како движењето, тоа би било сензација. Но, не постои пилула што може да ја продолжи долговечноста, да ја намали депресијата и анксиозноста, да го подобри здравјето на вашите коски или кој било друг фактор, како вежбањето, рече Конрој.