Авторката на бестселерот „The 5 Principles Of Parenting“, д-р Ализа Пресман, гостува во подкастот „Great Company“ со Џејми Лејнг, каде што открива колку оваа игра е важна за емоционалниот развој на децата.
„Ако на шестмесечно бебе му покажете очила на масата, а потоа ги покриете со салфетка, тие ќе помислат дека ги нема и ќе престанат да ги бараат. На таа возраст го немаат концептот за постојаност на објектот“, објаснува д-р Пресман.
Постојаноста на објектот е когнитивната способност да се разбере дека работите и луѓето постојат дури и кога не можеме да ги видиме.
„Околу деветтиот, десеттиот и секако до единаесеттиот месец, бебето почнува да го разбира концептот на постојаност на предметите и луѓето“, продолжува таа.
„Ако ги гледам очилата и тато ги покрие со салфетка, кога ќе ја подигнам салфетката, ќе ги најдам. Кога мама или тато играат криенка и велат „еве ме – ме нема – еве ме повторно!“, ме учат дека секогаш се враќаат“.
Токму затоа оваа игра е толку важна – не само што помага во развојот, туку на бебето му дава сигурност и доверба во родителите. Без трикови, без исчезнување засекогаш – само нежно учење дека луѓето остануваат присутни, дури и кога ќе заминат на кратко.
Покрај тоа, играњето криенка ја зајакнува врската помеѓу родителот и детето и му помага на малиот мозок да ја разбере низата на настаните и да предвиди што следува.
Кој би помислил дека толку едноставна игра може да биде толку значајна?