Симптомите на мултиплекс склероза може да се појават уште во дваесеттите години, јавувајќи се и исчезнувајќи во неправилни интервали. Според Здружението за мултиплекс склероза на Америка, повеќе од 2 милиони луѓе ширум светот страдаат од оваа болест.
Првичната дијагноза не е секогаш лесна бидејќи некои од симптомите се прилично општи и може да се поврзат со разни болести или состојби. Жените имаат два до три пати поголеми шанси да ја добијат оваа болест, а во продолжение прочитајте кои се најчестите рани симптоми на мултиплекс склероза.
Ослабнат вид
Нормално е да чувствувате одредени последици и на вашите очи да им треба време да се приспособат ако гледате во екранот осум часа секој ден на работа. Меѓутоа, ако забележите заматен вид или губење на видот дури и во денови кога не работите или генерално не се занимавате со таква работа, посетете лекар, особено ако симптомите се појавуваат само на едното око.
„Некои пациенти го опишуваат проблемот со видот како гледање низ заматено стакло или низ вода, а понекогаш има и болка или потешкотии при движење на очното јаболко“, објаснува Кетлин Костело, претседател на здружението за мултиплекс склероза на Америка.
Вртоглавица
Поради високите температури или големиот физички напор, сите понекогаш чувствуваме вртоглавица, но онаа што укажува на мултиплекс склероза обично се појавува како гром од ведро небо и удира со висок интензитет, така што може да предизвика и гадење или повраќање.
Секако, вртоглавицата може да биде и симптом на други здравствени проблеми, како што се низок крвен шеќер или низок крвен притисок. Во секој случај, ако често чувствувате вртоглавица, најдобро е да посетите лекар.
Хроничен замор
Заморот кој трае со недели и ве спречува да ги извршувате и наједноставните задачи дефинитивно е знак за загриженост и причина за посета на лекар.
„Луѓето со мултиплекс склероза го опишуваат својот замор како сеопфатен и толку тежок што дури и едноставните задачи се премногу тешки за нив“, објаснува Костело.
Вкочанетост и трпнење
Бидејќи мултиплекс склерозата го напаѓа централниот нервен систем, логично е дека ќе влијае и на нервите, што може да резултира со вкочанетост или трпнење.
Значи, од крајност до крајност: може да бидете лишени од секакво чувство, на пример, во рацете или да доживеете чувство слично на она кога мравка или некој друг инсект лази по вас.
Проблеми со мочниот меур
Проблемите со мочниот меур се јавуваат кај 80 проценти од луѓето со мултиплекс склероза. Тие се манифестираат како постојано чувство на потреба за мокрење, а може да бидат придружени со дијареа или запек, пренесува Women’s Health.
Когнитивни и емоционални проблеми
Бидејќи нервниот систем е центар на нашите когнитивни и емоционални функции, не е ни чудо што мултиплекс склерозата може да предизвика проблеми со неговото функционирање.
Околу 60 отсто од заболените се жалат на проблеми со извршувањето на повеќе задачи, концентрација или внимание, како и потешкотии со сеќавањето.
На полето на емоциите може да се јават депресија, нервоза, нагли промени во расположението или „емоционални испади“, како што е неконтролирано и неиспровоцирано плачење или смеење.
Болка во мускулите
Половина од луѓето со мултиплекс склероза живеат со секојдневна болка, често придружена со неконтролирани движења или слабост. Нозете најчесто се првиот дел од телото кој е погоден од овие симптоми, а потоа и грбот.