Додека општеството сѐ повеќе ја препознава важноста на емоционалната поврзаност на татковците со нивните деца, истражувањето на порталот „Родители“ открива загрижувачка статистика: дури 45 отсто од татковците избегнуваат отворено да зборуваат за своите чувства.
Уште повеќе, 59 отсто од нив признаваат дека би сакале да чувствуваат поголема поддршка и разбирање во својата родителска улога. Ова значи дека има татковци кои се борат и имаат потреба од поддршка – но не се сигурни од каде да почнат, особено поради стигмата што сè уште ја опкружува темата за менталното здравје.
Зборувањето за емоциите често се смета за немажествено, но тоа мора да престане. Татковците заслужуваат поддршка, разбирање и простор да зборуваат за своите чувства без страв од осуда. И сите ние можеме да помогнеме, зборувајќи за менталната хигиена на мажите.
Како се чувствуваат татковците?
83% од испитаниците велат дека ги ставаат потребите на своето семејство пред сопствените.
55% од татковците велат дека би сакале пријателите и членовите на семејството почесто да ги проверуваат.
51% од испитаниците велат дека изгубиле контакт со пријателите и поширокото семејство откако станале татковци.
46% велат дека би сакале другите повеќе да ги препознаваат преку нивната улога како родители. 38% велат дека не знаат како да ги изразат своите чувства.
27% од татковците велат дека никогаш не разговараат со пријателите за менталното здравје.
Со други зборови: многу мажи растат со верување дека мора да бидат поддршка на семејството – емотивно силни и стабилни, без право на слабост.
Зборувањето за чувствата често не им е опција бидејќи тоа не го правеле ниту нивните татковци, а не го прават ниту нивните пријатели. Имајќи предвид дека општеството продолжува да ја цени улогата на мајката во емоционалниот развој на детето, многу татковци сметаат дека нивниот придонес не е доволно признаен.
Неизразувањето емоции може да доведе до акумулација на стрес, чувство на изолација и, во тешки случаи, депресија. Што можете да направите?
Создадете безбедна средина за разговор
Отворените разговори за емоциите не треба да бидат табу. Татковците треба да знаат дека е во ред да бараат помош и дека тоа не ги прави слаби.
Промовирајте ја еднаквоста на родителската улога
Ова вклучува емоционална работа и препознавање на потребите на таткото.
Охрабрете ги групите за поддршка на татковците
Групите или форумите за татковци им овозможуваат на мажите да споделуваат искуства и чувства без страв од осуда.
Кампањите за татковството и менталното здравје можат да помогнат да се скрши стигмата.