Извинувањето е секогаш правилна и пристојна постапка, но детските психолози предупредуваат дека принудувањето на извинување не е најдобриот начин да се научи емпатија и да се подобрат односите меѓу децата.
На заедничките дружења често можете да видите ситуации во кои едно дете турка друго или му одзема играчка, а потоа многу родители инстинктивно реагираат принудувајќи го своето дете да се извини.
Сепак, иако изгледа учтиво, овој потег не е најправилен. Според детскиот психолог Лаура Маркам, принудувањето на децата да се извинат може да им испрати погрешни пораки. Таквиот пристап честопати не е насочен кон подобрување на односите, туку кон намалување на непријатноста на родителите во присуство на други возрасни.
Научете го вашето дете кога и зошто да каже „извини“
Маркам објаснува дека извинувањето под притисок не е ефикасно, бидејќи дете кое не е подготвено да изрази жалење нема да ја научи вистинската лекција од тоа. Таквиот пристап може дополнително да го засрами детето, што води во спротивна насока од она што е посакувано. Засрамено дете не се чувствува подобро и не развива емпатија. Наместо тоа, може да стане поповлечено, што го отежнува емоционалното поврзување со другите во иднина.
Самите деца честопати сметаат дека присилните извинувања не се искрени. Наместо да го принудувате детето да се извини, психологот Маркам советува да му помогнете да разбере што се случило и како може да ја поправи ситуацијата.
Едноставните постапки како враќање играчка, прашување пријател дали е добро или прегратка значат повеќе од механичко извинување. На овој начин, детето учи дека неговите постапки можат да влијаат на другите и да го поправат она што тргнало наопаку.
Дајте му простор да разбере
Важно е да му се даде простор на детето да се смири и да ја разбере ситуацијата. Ако е вознемирено, можеби ќе му треба момент да ги изрази своите чувства пред да може да размисли за последиците. Со постарите деца, корисно е да се мотивираат да размислуваат за начини сами да ја подобрат ситуацијата, наместо да им се наметнува „готова казна“.
Маркам нагласува дека најдобриот начин да се учат децата е преку личен пример. Кога родителот ќе направи грешка или ќе се оддалечи од детето, важно е да се извини и да покаже како да се воспостави повторно блискост и доверба. Преку такви моменти децата ја учат вистинската вредност на извинувањето и развиваат емоционална писменост што ќе им помогне во сите односи во текот на животот.