Ја знаете ли апликацијата што ја освои Кина? Илјадници млади луѓе ја симнуваат на своите уреди секој ден. Оваа апликација наречена „Дали си мртов?“ стана најпопуларната платена апликација во Кина, благодарение на длабоката социјална анксиозност: стравот од умирање сам и незабележан.
Апликацијата функционира многу едноставно. Корисникот мора да се пријави на секои два дена со притискање на големо копче за да потврди дека е добро. Ако не е, апликацијата го известува неговиот контакт за итни случаи, известувајќи го дека е можеби во опасност.
Според Би-Би-Си, апликацијата е лансирана во мај минатата година без многу помпа, но во последните недели бележи експлозивен раст. Илјадници млади луѓе што живеат сами во големите кинески градови масовно ја преземаат, катапултирајќи ја на врвот на листата на платените апликации во земјата.
Според податоците што ги цитираат кинеските медиуми, до 2030 година бројот на самци во Кина би можел да достигне 200 милиони.
Токму ова е општествената реалност кон која се насочува апликацијата, опишувајќи се како „безбедносен придружник“ за оние кои живеат сами: канцелариски работници, студенти далеку од дома, но и луѓе кои избрале поосамен начин на живот.
Корисниците на кинеските социјални медиуми отворено изјавуваат дека апликацијата реагира на вистински страв.
„Секогаш постои вознемиреност дека некој што живее сам може да умре без никој да знае. Честопати си мислам: ако умрам сам, кој ќе ме најде?“, пишува еден корисник.
Вилсон Ху, 38, кој живее на околу 100 километри од своето семејство, вели дека токму овој страв го навел да ја преземе апликацијата. Тој работи во Пекинг и, поради професионален проект, поминува многу време подалеку од сопругата и детето, честопати спиејќи на работа.
„Се грижам дека ако ми се случи нешто, би можел да умрам сам во куќата што ја изнајмувам и никој нема да знае“, објаснува тој. Затоа ја назначил својата мајка за свој контакт во итни случаи.
Сепак, името на апликацијата предизвика негативни реакции. Некои го сметаат за премногу морбидно и веруваат дека „носи лоша среќа“, додека други бараат да се промени во нешто попозитивно, како на пример „Дали си добро?“ или „Како си?“.
Компанијата зад апликацијата, Moonscape Technologies, изјави дека ги зема предвид критиките и размислува за промена на името.
На меѓународно ниво, апликацијата е позната како Demumu и е високо рангирана во продавниците за апликации во земји како што се САД, Сингапур, Хонг Конг, Австралија и Шпанија, веројатно поради кинеските корисници кои живеат во странство.
Името „Дали си мртов?“ е игра на зборови, инспирирана од популарна кинеска апликација за достава на храна, чиј изговор наликупотсетува на кинески.
Иако првично била бесплатна, апликацијата сега чини 8 јуани (околу 1,15 долари). Нејзините креатори – тројца млади луѓе родени по 1995 година – велат дека ја развиле за само 1.000 јуани. Меѓутоа, денес нејзината вредност драстично се зголемила и тие бараат инвеститори, проценувајќи ја својата компанија на околу 10 милиони јуани.
Во исто време, тие размислуваат за развој на нова верзија специјално дизајнирана за постари лица, во земја каде што повеќе од 20% од населението е над 60 години. Во неодамнешна објава, тие го повикаа општеството да покаже поголема грижа и разбирање кон постарите луѓе кои живеат сами, нагласувајќи дека „тие заслужуваат да бидат видени, почитувани и заштитени“.
Успехот на апликацијата, колку и да звучи морничаво, открива длабоко чувство на несигурност и осаменост во брзо менувачкото општество – и покажува како технологијата се обидува да ги пополни празнините што до неодамна им припаѓаа исклучиво на човечките односи.