Ги тепа другите деца, ве каса, пцуе, вели дека ве мрази?! Вакво однесување на детето ги загрижува родителите
Понекогаш однесувањата што им изгледаат загрижувачки или невообичаени на родителите всушност се сосема нормален дел од развојот на детето. Клучно е да се знае што е типично за одредена возраст, но и да се препознае кога е време да се побара стручна помош.
Експертите за развој на децата нагласуваат дека многу однесувања што ги вознемируваат родителите не се причина за паника, освен ако не станат чести, интензивни или не почнат да го попречуваат секојдневниот живот на детето и семејството.
Пцуење и „грди“ зборови
Дали вашето дете некогаш ви кажало дека ве мрази? Иако може да боли, психологот Ари Голдштајн објаснува дека децата не ја развиваат целосно контролата на говорот сè додека не наполнат околу седум години. Тие често не разбираат колку нивните зборови можат да ги повредат другите.
Во повеќето случаи, доволно е мирно да се објасни дека таквиот говор е погрешен. Меѓутоа, ако пцуењето се интензивира, стане поагресивно или вклучува реченици за самоповредување, важно е да побарате стручен совет.
Агресија кон други деца
До три или четири години, децата сè уште учат што значи да се дели, да се чека на ред и да се контролираат сопствените импулси. Туркањето, грабањето играчки или удирањето често се начини за тестирање на границите и се дел од учењето самоконтрола. Ако таквото однесување продолжи во училишна возраст и сериозно го попречува престојот во градинка или училиште, препорачливо е да се разговара со педијатар или специјалист.
Удирање со глава
Ова однесување често ги плаши родителите. Експертот за ран развој Лурдес Кинтана за порталот „Parents“ вели дека ако се случува ретко, обично не е причина за загриженост. Меѓутоа, ако детето го прави тоа често, не може да престане или се повредува, потребно е да се консултира специјалист.
Кога децата касаат
Касањето е честа фаза кај малите деца и обично е поврзано со фрустрација и неможност за вербално изразување. Детето може да се касне себеси, своите родители или други деца. Ако однесувањето не се намалува со текот на времето, не реагира на поставување ограничувања или се зголемува, важно е да се испита причината со помош на специјалист.
Проблеми со јадењето
Пребирливоста во исхраната е честа појава во раното детство. Децата истражуваат вкусови и текстури, а нивните апетити често се менуваат. Меѓутоа, ако дете од училишна возраст јаде многу малку храна или оброците постојано предизвикуваат стрес и конфликт, тоа е знак дека е потребно дополнително внимание.
Кога да побарате помош?
Експертите велат дека сè зависи од возраста на детето, зачестеноста и интензитетот на однесувањето. Ако однесувањето ги попречува односите на вашето дете, престојот во градинка или училиште, во семејниот живот или не покажува знаци на подобрување, време е да разговарате со професионалец.