Како бебињата се справуваат со екстремната топлина и како да ги заштитиме?

Експертите велат дека екстремната топлина може да биде опасна за бебињата, но само ако не пијат доволно течности и ако нeмаат адекватна нега.

Со оглед на тоа што бубрезите на бебето, кои ја регулираат размената на течности во телото, сè уште не се доволно развиени во првите денови од животот, телото не треба да се преоптоварува со прекумерни количини течности. Но кога температурите се многу високи, како што е случај периодов, важат други правила.

Како да го хидрирате бебето?

Иако упатствата наведуваат дека мајчиното млеко и адаптираното млеко ја задоволуваат потребата од течности, постојат мајки кои, следејќи ги советите (најчесто) на постарите членови на семејството, но и на некои здравствени работници, им даваат на своите бебиња дополнителна вода или чај.

Сепак, во лето, кога температурите надвор се над 30, речиси 40 степени Целзиусови, не е погрешно да му се понуди вода на детето во првите шест месеци, помеѓу хранењата. Нема ништо лошо во тоа.

Сепак, нема потреба од дополнителни течности ако мајката дои секој час. Меѓутоа, ако интервалите помеѓу хранењата се подолги и траат неколку часа, тогаш за време на многу високи летни температури, на детето треба да му се дава и малку вода или незасладен чај.

Ако дете под шест месеци е на адаптирано млеко, а температурите се високи над 30 степени Целзиусови – исто така ќе му понудиме и вода или незасладен чај.

Имено, потребите за течности тогаш се дури 50 проценти поголеми отколку во нормални околности. На пример, ако детето тежи пет килограми, му требаат околу 600 милилитри течност, кои ги добива преку адаптирано млеко. Но, во екстремно топли услови, му требаат дури 180 милилитри течност на килограм.

Идеална температура

Идеалната температура за дете е од 31 до 34 степени (кога е голо), или околу 24 степени (кога е облечено и покриено со памучна прекривка).

Ако се случи кожата на бебето да е потопла отколку што треба да биде (37-37,5), а детето е здраво, треба да се разлади. Ова значи дека ако бебето било надвор, на топлина или во прегреано возило, треба да се донесе во сенка и да се раскомоти (ако е испотено – пресоблечете го) и задолжително дајте му вода или подоите го.

Во текот на летните денови со високи температури, бебињата треба да се тушираат неколку пати на ден.

Како да ја разладите просторијата каде што престојува бебето?

На мало дете му е потребна термонеутрална средина. Климатизацијата не се препорачува за мали деца, но може да се вклучи во соседната соба и индиректно да ја разлади собата на бебето. Најдобро би било клима уредот да биде во едната просторија, а бебето во другата просторија со отворена врата. Исто така е добро да се создаде провев, да се проветруваат просториите во раните утрински часови, дури и во текот на ноќта, а потоа кога ќе почне да свети сонцето, спуштете ги ролетните, за да не влегува премногу сонце и да не ја загрева просторијата каде што е бебето.

Нега на кожата на децата

Никогаш не го изложувајте новороденчето на директна сончева светлина, прошетките се препорачуваат само рано наутро или предвечер, и секогаш со капа. За количката се препорачува заштита во форма на чадор за сонце.

Бебето исто така ќе покаже знаци на прегревање со мал, црвен осип на кожата, кој ќе исчезне кога детето ќе се олади. Ако црвенилото не исчезне, посетете го вашиот лекар.

УВ зрачењето е највисоко помеѓу 11 и 17 часот, кога се препорачува децата и доенчињата да останат дома и да бидат заштитени од топлината.

Облеката на бебето

Облеката на бебето мора да биде од природни материјали како што е памукот, кој овозможува кожата да дише и ја впива потта.

Кога се дома, во станот, можат да бидат во маица со прерамки или дури и во пелена за еднократна употреба. Кога се надвор, треба да носат памучни или ленени работи. Препорачливо е бебињата под шест месеци да носат долги ракави за да го избегнат сонцето.

Експертите велат дека најголемата грешка што ја прават родителите е да ги изнесуваат бебињата во колички покриени со пелени.

Можете да го заштитите бебето од сонце со капи и чадори што се прицврстени на количката, наместо да ја прекривате количката.

Како да одберете дестинација?

За бебиња под шест месеци, се препорачува дестинација со многу зеленило, поблиску до градот каде што живее семејството. Значи, не мора да биде море, одморите можат да бидат и на реки, планини, езера, каде што е многу полесно да се заштити детето од несакани фактори, првенствено од екстремна топлина и сонце.

Децата постари од една година, можат да одат на море со своите родители, но со почитување на сите препораки – да бидат на плажа до 10-11 часот наутро, да бидат соодветно облечени, да носат капи и родителите да им даваат доволно течности во текот на денот.