Кога нѐ боли целото тело, a не ја знаеме причината: Најболното место и насоката на ширење може да бидат патоказ кон дијагноза

Разбирањето на состојбите кои предизвикуваат различни видови на болка во телото е првиот чекор кон дијагнозата, соодветен третман и психофизичко олеснување.

Болката што се јавува во различни делови од телото без јасна, непосредна причина може да биде збунувачка и многу фрустрирачка. Кога болката се шири од мускулите до зглобовите, од ‘рбетот до екстремитетите и кога упорноста на симптомите не се намалува дури и по одмор, телото јасно ни испраќа сигнал дека нешто не е во ред.

Кои се можните причини за нејасната, неподнослива болка во целото тело?
Силната болка во различни делови од телото може да сигнализира цела низа хронични болести кои ги зафаќаат мускулите, зглобовите, па дури и внатрешните органи. Причината за таквата болка често не е во некоја обична физичка активност, туку во автоимуни нарушувања, инфекции, воспаленија или промени кои го нарушуваат целиот систем, особено ако не престануваат или се засилуваат. Разбирањето на овие состојби е првиот чекор кон дијагноза, адекватен третман и психофизичко олеснување.

Еве ги најчестите здравствени причини зошто може да нѐ боли целото тело, рангирани според интензитетот на болката од најтешка до најслаба.

Болка предизвикана од полимиозитис
Тоа е воспалителна, делумно дегенеративна мускулна болест која предизвикува силна и исцрпувачка болка во телото. Влијае на мускулите на желудникот, рамената, колковите, а може да влијае и на срцевиот ритам. Во потешките случаи доаѓа до пукање на мускулите и проблеми со дишењето, што дополнително ја влошува состојбата. Причината може да биде вирус или нарушување на имунолошкиот систем. Се лекува со лекови за воспаленија и зајакнување на имунитетот, како и со физикална терапија.

Ревматска полимијалгија (Polimialgia Rheumatica)
Интензивна болка и вкочанетост се јавуваат во вратот, рамената, надлактиците, горниот дел од нозете и колковите. Најчесто ги погодува жените постари од 50 години. Иако болката може да биде многу силна, не доаѓа до губење на мускулната функција, што е карактеристика на оваа болест. Болката е особено изразена наутро и може да биде збунувачки силна.

Анкилозен спондилитис
Оваа форма на хроничен артритис првенствено го напаѓа ‘рбетот, но може да ги зафати и колковите, колената и градите. Вкочанетоста и силните болки се особено изразени наутро. Во тешки случаи, може да дојде до целосна неподвижност на ‘рбетот, што ја прави оваа болест сериозна и болна.

Псоријатичен артритис
Комбинацијата на болни зглобови и промени на кожата е карактеристична за оваа болест. Болката е присутна во рацете, прстите, стапалата и колената. Често пулсира и предизвикува вкочанетост. Може да се појави само на едната страна од телото или да биде симетричен. Дополнително, пациентите често се жалат на силен утрински замор и намален опсег на движења.

Фибромијалгија
Болката предизвикана од оваа болест е постојана и се шири низ телото (мускули, тетиви, зглобови). Често е придружена со треска, замор, несоница, депресија и проблеми со концентрацијата. Иако не предизвикува оштетување на ткивото, симптомите на оваа болест значително влијаат на квалитетот на животот. Тоа е честа појава кај жените, а причините можат да бидат генетски и имунолошки.

Синдром на хроничен замор
Екстремниот замор кој не може да се објасни ниту со физичка, ниту со ментална активност е главниот симптом на хроничен замор. Болка во мускулите и зглобовите е присутна, но со помал интензитет. По него следуваат несоница, проблеми со меморијата и болки во грлото. Не постои специфичен лек, но лекарите можат да препишат терапии кои ги ублажуваат симптомите.

Лајмска болест

Првично се појавува грозница, болки во телото и главоболка, по каснување од крлеж. Осипот е карактеристичен знак, а болката може да продолжи и по завршувањето на терапијата. Третманот со антибиотици е неопходен и ефикасен, но некои симптоми може да останат долготрајни.