Учителке зошто не гледам ништо? Осумгодишно дете целосно ослепело поради лоша исхрана

Осумгодишно момче од Куала Лумпур наводно останало целосно слепо, без шанси да го врати видот, поради недостаток на клучните нутриенти во неговата исхрана.

Детето било лишено од најважните хранливи материи поради пребирливото јадење.

Имено, се вели дека осумгодишното момче од Малезија не јадело ништо освен пилешки нагетси, колбаси и колачиња уште од најрана возраст.

Момчето имало екстремен недостаток на витамин неопходен за одржување на здравјето на оптичките нерви.

Застрашувачката состојба на второодделенецот започнала за време на час во основно училиште во главниот град Куала Лумпур кога извикал: „Учителке, зошто не можам ништо да видам?“

Брзо бил однесен во болница и му бил дијагностициран тежок недостаток на витамин А, состојба која во помала мера погодува еден процент од Американците.

Витаминот А е клучна компонента во родопсинот, протеин чувствителен на светлина кој помага во производството на пигменти во мрежницата, кои му помагаат на видот во области со слаба осветленост.

Момчето веројатно страдало од оптичка атрофија, која предизвикува пропаѓање на клетките во оптичкиот нерв поради долготрајни оштетувања.

Д-р Ерна Надија, популарна малезиска докторка напишала во објава социјалните мрежи: „Како мајка… не можеме секогаш да готвиме затоа што сме зафатени… штета за родителите на овој ученик… не им е лесно да го прифатат тоа.“

Таа сега ги повикува родителите да бидат свесни за знаците на недостаток на витамин А: суви очи, сенки или сиви дамки на белките на очите, тешкотии при гледање ноќе или во темница или неможност за производство на солзи.

Храната богата со витамин А вклучува спанаќ, моркови, манго, папаја, кајсии, риба, пилешко, јајца и слатки компири.

Има неколку примери за слични случаи во САД.
Минатата година, DailyMail.com откри дека едно 12-годишно момче од Масачусетс ослепело под слични околности.

Детето страдало од аутизам и имало екстремна фобија од одредени текстури на храна, што значи дека живеело на храна од обични хамбургери, помфрит, крофни и сокови.

Утврдено е дека имало сериозни недостатоци на витамин А, витамин Ц, витамин Д, бакар и цинк.

Истражувачите забележале дека аутистичните деца може да имаат поголема веројатност да имаат екстремни фобии од храна поради нивните уникатни сензорни предизвици, што ги прави особено чувствителни на текстури, вкусови и мириси.

Аутистичните деца честопати се држат до рутина, па затоа може да претпочитаат одредена храна.

Експертите проценуваат дека едно од 100 американски деца имаат недостаток на витамин А, додека до 70 проценти од децата под 11 години може да имаат недостаток на витамин Д.

Едно од пет деца во САД не добива доволно витамин Ц.

Тешкиот недостаток на хранливи материи, наречен скорбут, е редок во развиените земји, но се чини дека се враќа во САД.

Состојбата – која може да предизвика паѓање на забите и екстремна болка – се зголемила тројно помеѓу 2016 и 2020 година, од околу осум на секои 100.000 деца на речиси 27.

Милиони деца во рурална Америка живеат во прехранбени пустини – населби каде што има ограничен пристап до здрава, свежа храна – кои се особено ранливи.

Но, иако исхраната е главен фактор што придонесува за скорбут, експертите велат дека постојат и други фактори во игра – вклучувајќи ја и зголемената стапка на аутизам кај малолетниците.