Ако вашето бебе не спие ноќе, најчесто му фали рутина

Еден од честите проблеми со кои се соочуваат родителите е неспиењето на нивното бебе ноќе. Еден од најчестите проблеми е немањето рутина.

Сите ние имаме некаква рутина која ја практикуваме пред да си легнеме. Од оние основните како миење заби и облекување пижами, до читање, слушање музика, броење овци… Најчесто, родителите кои и самите немаат некаква рутина туку едноставно заспиваат пред телевизор, не можат да им воведат рутина ниту на своите бебиња и деца.

Рутината подразбира секогаш исти чекори кои ќе претходат на ноќното спиење. На пример, бањање, или барем миење раце, лице и запчиња, облекување пижами, чаша млекце, читање приказна, бакнеж за добра ноќ…

Многу бебиња едноставно не можат да заспијат, се будат брзо или им се потребни посебни услови за да се смират. Но, честопати причините зошто бебињата не спијат (добро) можат да бидат грешки што родителите ги прават во текот на денот, а не се свесни за тоа.

Промената на одредени активности може да придонесе за мирен и квалитетен сон на бебето.

Кои се најчестите грешки што ги прават родителите, а предизвикуваат бебињата да не спијат?

Недостаток на рутина

Важно е бебињата да си легнуваат во исто време секој ден, активностите поврзани со спиењето да се повторуваат и оваа рутина да се одржува. Ако нема рутина или често се прескокнува, тоа само ќе го збуни бебето и нема да знае кога и дали е време за спиење, што треба да прави, а исто така ќе доведе и до нервоза што сигурно нема да му го олесни заспивањето. Негувајте рутина затоа што бебињата ја сакаат.

Непрепознавање на сигналите што бебето ги испраќа кога е поспано
Многу е важно да се препознаат најчестите „сигнали“ што бебето ги испраќа кога е поспано и кога е уморно. Најчесто тоа е триење на очите, прозевање, но може да биде и нешто друго, како што е зголемена нервоза или зголемена активност.

Осветлена соба каде што спие бебето
Во ред е ако ви треба ноќно светло во собата на бебето, но важно е да не биде премногу светло. Не е потребно да ја затемните собата каде што спие бебето преку ден, но важно е тоа да спие во што е можно „погуста“ темнина ноќе. На овој начин се учи препознавањето на денот и ноќта, што бебето на почетокот не го препознава, а што подоцна ќе биде од големо значење за да се воспостави правилен ритам во текот на денот. Исто така, спиењето е со подобар квалитет во текот на ноќта ако собата е темна.

Занемарување на дневните дремки и преморот на бебето

Научно е докажано дека бебињата спијат подобро ноќе кога се „одморени“, односно кога не се чувствуваат уморни. Дневните дремки се од големо значење тука и не треба да се занемаруваат. Многу активности без паузи за одмор во текот на денот можат само да предизвикаат нервоза кај бебињата кога е време за спиење ноќе, што нема да им го олесни заспивањето на кој било начин, а камоли квалитетот на спиењето.

Откажување од создавање навики што ќе помогнат во заспивањето
Постојат неколку техники благодарение на кои е можно да се „научи“ бебето да заспие само и да спие подобро, а на родителите е да откријат која е најдобра за нив и која навистина ќе им помогне. Без оглед на тоа што ќе изберат и како ќе одлучат да го успијат своето дете, важно е да не се откажуваат додека не постигнат „успех“, што сигурно ќе одземе многу време и трпение, но ќе вреди секоја секунда.

Освен што бебето ќе биде подобро бидејќи ќе спие подобро, што е многу важно за развојот, полесно ќе им биде и на родителите.