Дали знаевте дека и мајките кои посвоиле можат да ги дојат своите бебиња?

Исхраната на новороденчињата е тема за која нашироко разговараат експертите и родителите. Некои мајки избираат да го дојат своето дете, додека други сметаат дека адаптираното млеко е подобра опција за нив.

Сепак, малкумина знаат дека мајките кои не биле бремени и не родиле сепак можат да ги дојат своите деца. На пример, мајките-посвоителки или оние чие дете дошло на свет преку сурогат мајчинство.

Со многу посветеност и подготовка може да се овозможи доење без бременост (индуцирана лактација), велат од клиниката Мајо.

Природното производство на млеко (доење) е стимулирано со сложена интеракција помеѓу три хормони, естроген, прогестерон и човечки плацентарен лактоген, во текот на последните месеци од бременоста. За време на породувањето, нивото на естроген и прогестерон се намалува, што му овозможува на хормонот пролактин да се зголеми и да го активира производството на млеко.

Како се стимулира лактацијата?
Индуцираната лактација зависи од успешната репликација на овој процес. Ако идната мајка има неколку месеци да се подготви, лекарот може да препише хормонска терапија, како што е дополнителен естроген или прогестерон, за да ги имитира ефектите од бременоста. Хормонската терапија може да трае со месеци.

Приближно два месеци пред очекуваниот почеток на доењето, лекарот ќе ја прекине хормонската терапија, а мајката треба да почне да ги издојува градите со болничка електрична пумпа за гради. Ова го стимулира производството и ослободувањето на пролактин. Првично, треба да се издојува пет минути, три пати на ден. Потоа, треба да се издојува до 10 минути на секои четири часа, вклучително барем еднаш во текот на ноќта. Потоа, треба да се продолжи времето на издојување на 15 до 20 минути на секои 2 до 3 часа. Мајката треба да продолжи со оваа рутина додека не стаса бебето.

Ако мајката има малку време за да се подготви, хормонската терапија можеби нема да биде опција. Вашиот лекар може да препорача други лекови за стимулирање на лактацијата. Издојувањето останува важно без оглед на подготвителниот период.

Штом мајката ќе почне да го дои своето бебе, лекарот може да препорача да продолжи да издојува млеко, вклучително и по хранењето, за да се воспостави снабдување со млеко. Дури и ако лактацијата е успешно поттикната, може да биде неопходно дополнително хранење со формула, особено во првите недели од доењето.

За да се поттикне континуирана стимулација на брадавиците и градите, може да се користи опцијата за дохранување со вештачко млеко, преку тенки, флексибилни цевчиња кои се залепени долж градите на мајката до врвовите на брадавиците.

За оние кои сакаат да предизвикаат лактација, дефинитивно е важно да се консултираат со лекар или консултант за лактација.