Од фабинг и дабл фабинг до разделба и развод: За новата „болест“ на браковите и врските

„Би сакала мојот партнер да ме слуша, а не да гледа во телефонот“, „На средина од разговорот, тој/таа пишува пораки“, „Неговото/нејзиното внимание се преселило на мобилниот телефон…“. Ако ги препознавате овие ситуации во вашата врска или брак, можеби сте во замката на феноменот наречен „фабинг“.

Помеѓу забавата, придобивките и проблемите: Мобилните како средство за дистанцирање од светот околу нас
Свесни сме, како што вели брачната психотерапевтка Јасенка Југовиќ во интервју за порталот eKlinika, дека мобилните телефони станаа неопходен дел од секојдневниот живот и имаат значително влијание врз нашиот начин на живот и интеракциите со другите. Тие ни обезбедуваат информации, комуникација и забава на дофат на раката, а воедно незабележливо нè дистанцираат од светот околу нас.

„Во контекст на партнерствата и комуникацијата во врската, употребата на електронски уреди може да ни помогне да останеме поврзани, ако не сме физички заедно. Сепак, тие можат да имаат негативно влијание врз партнерството ако вашиот партнер гледа повеќе во својот телефон отколку во вас“, вели Југовиќ.

Што е фабинг?

„Фабинг“ (Phubbing) е кратенка од англискиот израз phone snubbing, кој пак е комбинација од зборовите phone (телефон) и snubbing (одбивање или отфрлање) и подразбира игнорирање или занемарување на некого во реалниот свет заради употреба на мобилниот телефон.

„Фабинг е чин на игнорирање на вашиот партнер и обрнување внимание на вашиот мобилен телефон, особено кога вашиот партнер ви кажува нешто или на друг начин сака да се поврзе со вас. Суштината е да му покажете на вашиот партнер дека е помалку важен од вашиот паметен телефон. Вашиот партнер кажува нешто, а вие почнувате да твитате, не гледајќи го во очи, ставајќи му до знаење дека не ве интересира ниту што зборува, ниту изразот на лицето, гестикулацијата или говорот на телото. Студиите покажуваат дека таквото однесување обично се перцепира многу негативно – вашиот партнер се чувствува како намерно да го игнорирате“, опишува брачната терапевтка.

Таа исто така додава дека ова однесување покажува непочитување кон вашиот партнер и јасно испраќа порака дека не сте заинтересирани да разговарате со него. Истражувањата покажале дека сè повеќе модерни парови се погодени од фабингот, па затоа може со сигурност да се каже дека фабингот е нова „болест“ на партнерските односи.

И жените и мажите практикуваат фабинг: „Би сакал/а да ме слуша, наместо да гледа во мобилниот телефон“

Јасенка Југовиќ вели дека сè повеќе од клиентите слуша ситуации како:

„Првото нешто што мојот партнер го прави кога ќе се разбуди наутро е да го зграби телефонот и да почне да пребарува по социјалните мрежи или да проверува е-пошта“.
„Сакав да споделам со мојата партнерка што ми се случи на работа, но таа го зеде телефонот на средина од мојата реченица за да ја провери пораката што пристигнала на нејзиниот мобилен телефон“.
„Би сакал/а да ме слуша, наместо да гледа во мобилниот телефон“.
Ваквите ситуации можат да предизвикаат многу расправии меѓу партнерите во врската, бидејќи во суштина ве тераат да се чувствувате игнорирани, вели Југовиќ.

Дали имаме шанса да се натпреваруваме со мобилниот телефон: Фабингот го става партнерот на „игнор“
Мора да го повторувате истото неколку пати, сè додека вашиот партнер, опиен од екранот, не регистрира што сте кажале или едноставно се чувствувате запоставени, бидејќи на вашата врска ѝ недостасува комуникација и ви недостасува внимание? Повеќе не го поминувате времето заедно дружејќи се и разговарајќи како порано – туку се натпреварувате за внимание со паметниот телефон, од кој вашиот партнер не може да ги тргне очите? На половина од разговорот, тој/таа го вади телефонот и нешто куцка на него. Иако вашиот партнер е сè уште физички со вас, тој повеќе не е присутен. Неговото внимание се префрлило на мобилниот телефон. Во моментот кога вашиот партнер го префрла погледот и вниманието на телефонот, тој ве „игнорира“ вас и она што му го кажувате. И не е ни чудо што се чувствувате повредени или, како што вели самиот збор фабинг – отфрлени.

Дисконекција со себеси, но и со партнерот: Фабингот е знак на незадоволство од врската или бракот

Како и секоја зависност што го нарушува животот, фабингот е знак на прекин на врската со себеси и со партнерот, истакнува Југовиќ. Секој пат кога сакаме да избегаме од оваа наша реалност (затоа што не ни се допаѓа), имаме тенденција да бегаме во лажна, илузорна реалност, со цел да одложиме нешто што е важно, избегнувајќи болка или проблем.

Брачниот психотерапевт потврдува дека е многу полесно да се поврзете со луѓе во виртуелниот свет, додека во реалниот свет е многу потешко да се изгради вистинска врска.

Според неа, фабингот е чест показател за незадоволство од партнерскиот однос: недостаток на блискост, комуникација, интимност, секс – можеби партнерите се заглавени во монотонија, или можеби е тактика за да се избегне некој друг проблем во партнерскиот однос.

Влијание врз семејството, не само врз партнерот: Од „куцкање“ до лутина, тага и конфликт

Мобилните телефони ги уништуваат врските бидејќи нивната употреба може да нè поврзе со виртуелниот свет и луѓето кои се далеку, но исто така може да нè одвлече од оние блиски до нас и негативно да влијае на квалитетот на комуникацијата, емоционалната поврзаност, интимноста и блискоста со нашиот партнер.

„Овој начин на погрешно распределување на вниманието директно или индиректно оштетил или дури и завршил многу партнерства. Фабингот може да доведе до чувство на дисконекција во партнерствата. Партнерот станува недостапен и ја игнорира семејната ситуација во која би била потребна неговата поддршка. Членовите на семејството може да се чувствуваат игнорирани, отфрлени, омаловажени и неважни секогаш кога ќе се обидат да му пристапат на лицето за каква било форма на комуникација или воспоставување блискост и размена на емоции.

Партнерите доживуваат зголемено незадоволство од врската и партнерот, што често води до симптоми на стрес, анксиозност и депресија, бидејќи квалитетот на емоционалните врски и чувството на задоволство и сигурност во голема мера влијаат на квалитетот на животот.

Партнер кој се чувствува помалку важен и значаен од телефонот може да се чувствува тажно, што може да се претвори во лутина. Лутината, болката и тагата лесно можат да се претворат во конфликт меѓу емоционалните партнери – предупредува Југовиќ/

Распаѓање на довербата, љубомора, помала желба за секс…

Југовиќ дава примери за тоа како социјалните мрежи не само што нè одделуваат од нашиот партнер, туку честопати предизвикуваат и љубомора. Која е личноста чија слика му се допаднала? Со кого се допишува? За што зборуваат? Довербата сè повеќе се доведува во прашање, а една од главните причини е неизвесноста и љубомората. Сето ова влијае на сексуалниот живот. Партнерот ја губи желбата, а со тоа емоционалната врска полека, но сигурно станува бесмислена.

Што е дабл фабинг: Погубно влијание со ризик од развод

Исто така, потврдено е дека во значителен процент од браковите постои „дабл фабинг“.

Ова значи дека двајцата партнери скролаат низ Фејсбук, проверуваат пораки, пишуваат пораки или играат игра во присуство на својот партнер, или дури и додека отсутно разменуваат неколку реченици едни со други. Колку што има повеќе фабинзи во комуникацијата на паровите, толку е постуден и подалечен односот меѓу партнерите, колку повеќе конфликти и незадоволство, толку помалку се среќни во бракот и толку е поголем ризикот од развод, предупредува брачната психотерапевтка.

Совети за „победа“ над мобилниот телефон и избегнување на фабингот

Користете го вашиот паметен телефон – мудро. Телефоните треба да ни служат нам, а не ние ним. Не дозволувајте технологијата да се меша во вашата врска и изградете ја на цврсти, а не на интернет темели. Современото доба бара постојано прилагодување, но не само кон технологијата, туку и кон луѓето кои се погодени од технолошкиот напредок.

1. Помогнете му на вашиот партнер да разбере колку фабинзите негативно влијаат на вашата комуникација, интимност, блискост и целокупниот квалитет на вашата врска и решете го ова прашање пред да биде предоцна. Кажете му дека се чувствувате запоставено и осамено. Многу корисна формула за изнесување на сите видови тешкотии е: Се чувствувам (…), кога правиш (…). На пример: „Се чувствувам повредено кога се враќам дома, а ти не го креваш погледот од телефонот.“ Овој трик функционира затоа што не го ставате фокусот или вината само на вашиот партнер.
2. Прашајте се себеси и вашиот партнер од што бегате кога сте на телефон долго време? Од што бега вашиот партнер? Дали сте забележале некои модели на однесување кај себе или вашиот партнер и каква акција ќе преземете? Овој разговор треба да ви помогне да идентификувате некои проблеми што можеби не сте ги забележале претходно. На пример, може да откриете дека сте заглавени во монотонија и дека тоа е причината за проблемот. Или, можеби вашиот партнер обрнува поголемо внимание на својот телефон за да избегне комуникација со вас од некоја причина. Сепак, можеби ќе сакате да размислите дали користењето на вашиот телефон е тактика за игнорирање и избегнување на друг проблем во вашата врска. Ако имате претчувство дека е тоа случај, спомнувањето на ова во разговорот со вашиот партнер би можело да го реши основниот проблем. Размислете за вашата заедничка врска, што недостасува.
3. Потребно е да се воспостават одредени правила во врска со употребата на мобилни телефони. Ограничете ја употребата на телефонот на одредени периоди од денот или за време на одредени активности. Еден пример би бил да се договорите со вашиот партнер никогаш да не внесувате таблети или телефони во спалната соба. Ова ќе ви помогне да запомните дека вашата спална соба е интимен простор, кој го делите двајцата, дека сте присутни во моментот кога сте таму заедно. Поголема е веројатноста да разговарате и да бидете интимни бидејќи сте фокусирани еден на друг.
4. Дигитална детоксикација! Обидете се да поминете неколку пријатни денови без никаква технологија, правејќи нешто заедно во што двајцата уживате. Планирајте заеднички излегувања и држете се до договорот. Ова не само што ќе помогне да се реши проблемот со тоа што вашиот партнер гледа повеќе во својот телефон отколку во вас, туку ќе ја подобри и вашата врска, блискост и комуникација.
5. Вложете напор да ја продлабочите вашата врска и да го зголемите нивото на емоционална и физичка интимност. Без разлика дали само нежно го галите вашиот партнер, го прегрнувате повеќе или сте поинтимни, покажете му дека постојат многу подобри начини да го добиете тој допамински наплив. Започнете го денот со прегратка со вашата сакана личност, бидејќи две минути нежност, прегратки и бакнежи можат многу да помогнат во поврзувањето со вашиот партнер.
6. Бидете достапни за вашиот партнер во сите ситуации кога му е потребно вашето внимание или емоционална поддршка. Слушајте внимателно, спуштете го телефонот и не го кревајте се додека сте му потребни на вашиот партнер. Потребни се само неколку ситуации каде што реагирате на емоциите на вашиот партнер со негирање и се свртувате кон вашиот телефон, за емоционалниот канал меѓу вас да се затвори на подолго време, а можеби и засекогаш.
7. Важно е да бидете свесни за сопствените навики за користење телефон и да обрнете внимание на оние што ги сакате. Одржувањето рамнотежа помеѓу дигиталниот и реалниот свет може да биде клучно за одржување на менталното здравје и здравите меѓучовечки односи. И конечно, не дозволувајте вашиот мобилен телефон да биде трета страна во вашата врска и брак – заклучува брачната психотерапевтка Јасенка Југовиќ за порталот eKlinika.