Ова се најголемите грешки што ги правите кога вашето дете има температура

Ретки се родителите кои не ја доживуваат покачената температура кај своите деца како драматична, особено кога се тие многу мали. Како што пренесува Cafe Mom, постојат неколку грешки кои родителите најчесто ги прават кога нивното дете добива температура, а не би требало.

3.393

Високата температура кај децата е еден од најчестите симптоми на разни болести. Родителите обично ја доживуваат како драматичен настан што укажува на сериозна болест на детето, но тоа не мора секогаш да биде случај. Како што пренесува Cafe Mom, постојат неколку грешки кои родителите најчесто ги прават кога нивното дете добива температура, а не би требало. Педијатарката Алана Левин објаснила кои се овие грешки и како можат да му наштетат на вашето дете.

Го прегревате детето
Педијатарката предупредува дека никогаш не треба да го затоплувате детето кое има температура. Имено, детето се жали на студенило во фаза на покачување на температурата, рацете и стапалата може да му се ладни и да има грозница. Родителскиот порив е автоматски да му угодат на детето, што значи да го загреете со облека, да го покриете и да ја загреете просторијата во која престојува.

„На овој начин само дополнително ја поттикнувате температурата да се зголеми, детето да се прегрее и ризикувате фебрилни конвулзии, особено кај деца под две години“, објаснува Левин, додавајќи дека родителите треба да го прават токму спротивното – да го соблечат детето, да му дадат течности, чепчиња или сируп, да го истушираат со млака вода, да го исушат и да го облечат во поширочка памучна облека. Исто така, педијатарката нагласува дека е потребно да се следи температурата на секој час и да се реагира доколку таа нагло скокне или воопшто не може да се спушти.

Веднаш трчате во болница
Температурата сама по себе не е итен случај, особено ако не е премногу висока. Токму затоа повеќето родители грешат затоа што веднаш брзаат да го однесат детето со температура во болница.

„Многу родители, за жал, пребрзо реагираат и паничат кога нема потреба за тоа. Важно е луѓето да разберат дека покачената температура е всушност одбранбен механизам на детето што му помага да се бори против болеста или инфекцијата. Како и да е, не е итен случај ако температурата не е превисока или не се намалува со чепчиња или сируп“, објаснува Левин.

Давате лекови без консултација со педијатар

Секој третман или терапија без претходна консултација со педијатар е едноставно забранет и е многу лоша идеја, предупредува педијатарката.

„Повеќето родители се внимателни со лековите, но има и такви кои на своето дете ќе му дадат средство за намалување на температурата без претходно да се консултираат со педијатар. Тоа воопшто не е паметно, тоа им го кажувам на сите мои пациенти. Како што не би земале лекови без рецепт за посериозна состојба, истото не треба да го правите и кога станува збор за вашето дете, инаку може да направите повеќе штета отколку корист“, објаснува таа.

Го ладите детето со алкохолни облоги
Алкохолот може да предизвика црвенило на кожата и дополнително загревање за само неколку минути, се апсорбира преку кожата и може да дојде до труење, како и преку испарувањата на алкохол кои се издигнуваат од врелата кожа, а детето потоа ги вдишува. За алкохолот нема место во намалувањето на температурата кај децата, советува педијатарката.

Не ја почитувате дозата на антипиретици со оглед на возраста на детето
Пречестата примена на антипиретици, прекумерните дози, како и лошата комбинација на ибупрофен, парацетамол или дури и волтарен супозитории, кои се индицирани само кај деца постари од две години, може нагло да ја намали температурата за неколку степени и да доведе до хипотермија, што е многу поопасно од одржување на умерено покачена температура.

Инсистирате на мирување
Една од најчестите грешки што ги прават родителите кога детето има температура е инсистирањето на одмор. Педијатарката објаснува дека воопшто не е потребно, особено ако се работи за малку покачена температура. Имено, дозволена е умерена активност, а тоа ќе ви олесни да ја забележите општата состојба на детето.

Повеќе