Што е РЕГРЕСИЈА НА СОНОТ кај бебињата и зошто се јавува?

Кога ќе се роди бебето, целиот свет почнува да ви се врти околу него, а ова е најзабележително кога станува збор за спиењето. На секое помрднување, движење или звуци кои ги испушта бебето додека спие, мајката се буди и проверува дали сè е во ред.

Некои бебиња можат многу брзо да почнат да спијат цела ноќ, додека на други им треба повеќе време за тоа. Кога станува збор за спиење, она што е заедничко за повеќето бебиња е тоа што, без оглед на рутините што ги имале дотогаш, може да има промени во нивниот ритам на спиење – или регресија на спиењето.

Што е регресија на спиењето?

Регресијата на спиењето е забележлива промена во ритамот на спиењето на бебето, кое дотогаш имало цврст сон и не се будело често. Ова не е регресија во вистинската смисла на зборот, бидејќи бебето најверојатно ќе се врати на својот стар ритам на спиење. Регресијата на спиењето се јавува многу често за време на периодот на скокови во развојот и најдобро може да се опише како немирен сон на бебето со чести будења. Тоа често будење дури може да значи будење на секои 20 минути, што може да биде многу заморно за родителите.

Регресијата на спиењето се случува без најава и повеќето мајки ја опишуваат регресијата како тежок период и многу често оваа фаза ги фаќа неподготвени бидејќи веќе се навикнале на одредена рутина со своето бебе.

Кога се јавува регресијата на спиењето?

Регресијата на спиењето се јавува точно во одредени периоди. Според педијатрите, периодите во кои може да се очекува овој феномен се околу следниве возрасти на бебето:
4 месеци
6 месеци
9 месеци
12 месеци
18 месеци
24 месеци

Зошто се јавува регресијата на спиењето и колку долго трае?

Регресијата на спиењето трае помеѓу една и четири недели. Во овој период, бебето ќе се разбуди ненадејно или дури ќе ги прескокне дневните дремки.

Промените во режимот на спиење и почестите будења се јавуваат најчесто во првата година од животот на бебето, а една од причините е што мозокот на бебето се развива многу брзо во тој период. Овие промени можат да доведат до почести будења.

Друга причина за регресија на спиењето е хормонот за раст соматотропин, кој им помага на бебињата да растат, но исто така им го отежнува спиењето.

Бебето го запознава овој свет на најубав можен начин и секојдневно доживува нови работи. Во првата година од животот, бебето прави голем напредок – од кревање на главата за прв пат, свртување на стомак и ползење, па сè до одење придржувајќи се за мебелот и правење на првите чекори. Толку многу промени, или поточно скокови во развојот, ќе направат вашето бебе да спие помалку.

Како да реагирате додека трае?

Главната карактеристика на регресијата на спиењето е тоа што бебето се буди почесто од вообичаеното и има тешкотии да му се врати на спиење. На почетокот, можеби не знаете за што станува збор, но кога слично однесување се повторува ноќ по ноќ, ќе почнете да сфаќате дека станува збор за регресија.

Важно е да знаете дека ова не е трајна состојба и дека бебето ќе спие подобро кога сè ќе помине. За време на регресијата на спиењето, бебето ќе бара повеќе внимание и галење, а на вас останува да му пружите утеха и љубов.

Кое е решението?

Трпението е клучот.

Тешко е да се каже кое е решението за регресијата на спиењето бидејќи таа ќе исчезне само по себе. Она што треба да го знаете е дека сонот создава сон и дека никогаш не треба да ги одложувате дневните дремки на вашето бебе за да спие подобро ноќе. Оваа техника не е добра за бебето бидејќи стресот ќе го направи бебето уште понапнато и ќе биде многу потешко да го заспиете.
Променете го фокусот од себе и бебето – обидете се да спиете кога спие и бебето, за да бидете подготвени за ненадејни будења во текот на ноќта. Ова ќе ви помогне да имате повеќе трпение и сила да се справите со оваа многу заморна фаза.
Многу родители во овие моменти ги доведуваат во прашање своите вештини, па дури и мислат дека го разгалиле бебето или „го научиле на раце“. Не го лишувајте вашето бебе од гушкање за време на регресиите на спиење, бидејќи со нежно галење по грбот или главата ќе му олесните повторно да заспие.