Заспивањето на бебето може да биде предизвикувачка задача, а родителите се обидуваат на различни начини да го пронајдат оној кој најдобро функционира за нивното бебе. Овде, првенствено зборуваме за заспивање на бебиња на возраст под три месеци. Имено, толку малите бебиња сѐ уште ги паметат звуците кои ги слушале во утробата и тие сѐ уште им се најдобар начин да се смират и да заспијат.
Како да го прилагодиме бебето на околностите кои воопшто не се слични на оние во утробата на мајката? Покрај тоа што го нишате, го повивате со памучно ќебе, има уште еден трик кој е сѐ попопуларен меѓу родителите. Новороденчињата едноставно обожаваат звуци како што се оние на фен или правосмукалка.
Сепак, тешко е да го вклучите фенот секогаш кога бебето ќе заспие и да го држите блиску за да може неговиот звук да има благотворно дејство. Ако сте пребарувале на Интернет, можеби сте налетале на видеа на YouTube на кои се гледа бебе како спие со звук на фен во позадина, а тоа ви дава надеж дека и вашето ќе спие така.
Можете да најдете различни варијации на оваа тема на Youtube, а еве зошто можеби ќе сакате да го испробате овој трик.
Зошто фен за коса?
Како што рековме, бебето било заштитено во вашата утроба девет месеци, а надворешните звуци биле пригушени. Но, тоа било изложено на различни звуци кои доаѓаат од вашето тело: ја слушало работата на вашето варење, циркулацијата на крвта, чукањето на вашето срце… Замислете каков спектар на фина бучава е ова.
И тогаш тоа доаѓа во свет каде што сите звуци се поинтензивни, појасни, попродорни, па секако му недостига убавата врева со која се одморало.
Звукот на фен влегува во спектарот на звуци кои се нарекуваат и „бел шум“ или „бела бучава“, а тоа е звук што содржи звуци од сите фреквенции кои се подеднакво распоредени во опсегот на фреквентниот појас, нешто како бела светлина која е составена од континуиран низ од сите бои од видливиот спектар.
Всушност, белиот шум ги камуфлира другите звуци од околината кои може да го вознемират новороденчето во сон, а исто така му дава чувство на познатото опкружување од утробата бидејќи се совпаѓа со фреквенцијата на звуците што ги слушало 9 месеци.
Придобивките од белиот шум при заспивање на бебето
Ако бебето реагира на белиот шум така што заспива надвор од вообичаеното време за спиење, тоа значи дека добро реагира на овие фреквенции и дека тоа може да има одредени придобивки.
Белиот шум може да биде вистинска магична формула за заспивање на бебето и да му помогне да заспие многу побрзо отколку без звучна позадина. Бебето ќе се фокусира на познати фреквенции, така што нема да биде вознемирувано од други звуци кои доаѓаат од околината. Овој метод на смирување и заспивање на вашето бебе ќе биде особено корисен ако имате постаро дете, чиј ритам на спиење не одговара на оној на бебето, па разиграниот постар брат или сестра нема да му го нарушат сонот.
Но, има и недостатоци
Бебето кое се навикнува да заспива на бел шум може да има проблеми со спиењето ако одеднаш го отстраните од нејзината рутина. Затоа, како што расте детето, белиот шум треба да биде потивок, а неговото елиминирање од рутината за заспивање треба да биде постепено.
Се разбира, не реагираат сите деца подеднакво на белиот шум, па на некои тој може да им биде дури и вознемирувачки.