Децата кои пропуштаат појадок се помалку среќни и расположени во животот, покажало светското истражување

Децата кои често го пропуштаат појадокот имаат помалку радост и задоволство во животот, се полошо расположени и помалку среќни од децата кои имаат редовен утрински оброк, покажало истражувањето спроведено на речиси 150.000 млади луѓе ширум светот.

Најсреќни се децата од Португалија кои никогаш не го пропуштаат појадокот

Истражувањето, објавено во списанието BMC Nutrition Journal кое го воделе Anglia Ruskin University и Universidad de las Americas, покажува речиси линеарна врска помеѓу редовниот појадок и поголемото задоволство од животот кај децата и адолесцентите на возраст меѓу 10 и 17 години од 42 земји во светот.

Највисоката оценка за задоволство од животот е идентификувана кај учесниците кои појадувале секојдневно, додека најниската оценка е забележана кај децата кои никогаш не појадувале.

Меѓу испитуваните деца од 42 земји, најсреќни биле децата кои појадувале секој ден во Португалија.

За разлика од нив, најмалку среќни и задоволни биле децата од Романија, кои никогаш не појадуваат, што укажува на потенцијални социо-економски фактори кои исто така влијаат на резултатите.

Во групата деца кои појадувале секој ден, децата од Велика Британија се на петтото место меѓу помалку среќните и задоволни деца, зад Романија, Унгарија, Германија и Австрија.

Кога го пропуштате појадокот, забележувате лошо расположение, анксиозност, стрес…

Ли Смит, професор по јавно здравје на Универзитетот Англиа Раскин и еден од водачите на студијата, вели дека истражувањето било обемно и открило конзистентна врска помеѓу зачестеноста на појадокот и задоволството од животот.

„Постојат неколку потенцијални причини за ова. Претходните студии покажуваат лошо расположение кај адолесцентите кои го прескокнуваат појадокот, како и повеќе случаи на анксиозност, стрес и депресија.

Освен тоа, јадењето соодветен појадок ја обезбедува потребната енергија и хранливи материи за оптимално когнитивно функционирање и ја подобрува концентрацијата, меморијата и способноста за учење“, објаснува професорот Смит.

Минералите и витамините кои децата ги внесуваат преку појадокот играат важна улога во нивното расположение

Друга причина за ваквите резултати, како што наведува, може да биде мешавината на витамини и минерали кои ги добиваме од секојдневниот појадок.

„А ако ги внесуваме нередовно, тоа може да доведе до помало задоволство од животот со текот на времето. Редовната рутина, која вклучува појадок, исто така може да донесе структура и позитивен тон во остатокот од денот.

Резултатите покажаа одредени недоследности меѓу земјите, на кои може да влијаат различни култури и начин на живот, како и социо-економски фактори.

Сепак, и покрај ова, нашите резултати покажуваат дека во сите испитани земји среќата и доброто расположение, односно задоволството од животот воопшто, се повисоки кај оние кои редовно појадуваат отколку кај децата кои го прескокнуваат првиот оброк во денот“, нагласува професорот Смит.