Во училиштата низ Кина и Тајван, вообичаено е на учениците да им се овозможи получасовна или дремка од еден час, која се случува веднаш по ручекот. Ова е познато како wujiao и е познат концепт во оваа земја.
Иако оваа навика може да изгледа бизарно, наставниците инсистираат на тоа дека децата се задоволни со тој период за дремка.
Во многу училишта децата кои се доволно мали за да се испружат врз нивните дрвени клупи, немаат проблем да дремнат во ваква положба.
Еден од највозбудливите моменти за 7-годишната Џанг Руојун во работните денови е напладне, кога чека столчињата од училницата да се претворат во лежалки за таа да дремне.
Околу 12:30 часот, нејзините учители ѝ наложуваат на Руојун и на нејзините соученици да ги наместат своите бироа, да го повлечат столот во лежечка положба и да си ги извадат малите јорганчиња што го донеле од дома за да уживаат во едночасовната дремка по паузата за ручек.
„Одлично. Не морам да дремам на пладне со потпирање на главата на бирото“, вели таа.
Второодделенката во основното училиште Чунгуанг во Хандан, провинцијата Хебеи, Руојун вели дека целиот процес на местење на столот и бирото ѝ е задоволство.
Ванг Хуиксиао, мајката на Руојун, рекла дека училиштето на нејзината ќерка започнало да го воведува „проектот за дремење во лежечка положба“ минатата година и родителите и учениците ја поздравиле иницијативата.
Руојун ја развила навиката да дреме удобно во градинка, па откако тргнала во прво одделение, тешко се прилагодувала да дреме на своето биро, вели Ванг.
„Ќерка ми ми кажа дека после тоа почувствувала вкочанетост во рацете и нозете. Мислам дека тоа беше лошо за развојот на ‘рбетот и влијаеше на квалитетот на нејзиниот сон“, рекла таа.
Нејзиниот учител, исто така, рече дека Руојун дремела за време на часовите попладне, а понекогаш заспивала и навечер додека ги правела домашните задачи, рекла Ванг.
Почнала да ја зема ќерка си напладне за да може квалитетно да се одмори дома за време на паузата. Сепак, имајќи предвид дека и Ванг и нејзиниот сопруг работат, земањето Руојун двапати секој ден било предизвик за семејството.
Жу Фангфанг, мајка на ученик од трето одделение во училиштето, рече дека на нејзиниот син исто така многу му се допаѓа новата иницијатива за спиење.
„Немаме време да го земеме напладне, па мораше да руча во училиштето и да спие на своето биро“, рече Жу. „Многу е тешко да се очекува малите момчиња да спијат добро во таква непријатна положба“.
Откако училиштето ја воведе новата иницијатива, нејзиниот син ја однесе својата омилена перница на училиште. Дремката со соучениците му стана еден од омилените периоди од денот, додала таа.
Хао Јуфанг, заменик-директорот, вели дека училиштето ги купило прилагодливите столчиња и маси преку Интернет. Трошоците биле покриени од локалните образовни власти.
Освен што учениците се буделе со вкочанетост на вратот и рацете според стариот систем, таа рекла дека бидејќи учениците имале проблем да заспијат, понекогаш разговарале меѓу себе, прекинувајќи ја дремката и спречувајќи многумина да се одморат соодветно.
Сега, бидејќи можат да легнат да дремат, учениците уживаат во подобар квалитет на спиење и се поенергични попладне, вели таа.
Наставник во училиштето објави видеа од учениците како ги местат масите и столовите на страницата за кратко видео Douyin, што доведе до онлајн пофалби за иницијативата.
„Се надевам дека сите училишта ќе користат ваков вид столици и маси за учениците да имаат убава дремка“, бил еден од коментарите.
Според новинската агенција Ксинхуа, повеќе од 21.000 ученици од основните училишта во Хандан сега лежат за време на нивната пладневна дремка. Џанг Хехонг, директор на бирото за образование на Хандан, изјави за China Education Daily дека сите ученици во Хандан ќе учествуваат во новата иницијатива за спиење во следните три години.
Основното училиште Ксингфухе во Хангжу, провинцијата Жеџијанг, исто така, добило пофалби за тоа што ги оставило своите ученици да спијат еден час напладне во шатори поставени во пространи простории за настани.
Училиштето им дозволува на учениците да ги украсуваат своите шатори, да прават правила за спиење и да го именуваат секој шатор, според Qianjiang Evening News.
Џоу Хонг, директор на училиштето, вели дека преку специјалната иницијатива за спиење, училиштето ги поттикнува учениците да внимаваат на спиењето и да уживаат во него. Тоа, исто така, ги учи да бидат независни, имајќи предвид дека сами се задолжени за своите шатори и да се навикнат на тоа да имаат свој простор, вели таа.
Меѓутоa, некои училишта во Кина се нашле на удар на критики затоа што наводно им наплаќале на учениците минимум 200 јуани (27,44 американски долари) по семестар за да им дозволат да дремнат за време на попладневниот одмор за ручек.
Според објавите на тамошните социјални мрежи, за спиењето на маса и спиењето на душек биле предвидени трошоци од 200, односно, 360 јуани по семестар, соодветно на тоа дали станува збор за спиење на клупата или за спиење на душек, додека учениците треба да платат 680 јуани по семестар за да поседуваат кревет во специјална соба за дремка. Но, сето ова е доброволно, се вели.
Случајот се најде на врвот на онлајн топ листите за теми во тренд, при што релевантниот хаштаг собра 1,7 милиони прегледи на платформата Weibo која е слична на Твитер.
Многу корисници на Интернет го обвинија училиштето за неразумните трошоци. „Дали на нашите деца им треба наставник за да им ја чува дремката? Дали ви е пријатно да ве зјапаат додека спиете? Зошто да наплатувате пари? Дали училиштето е толку сиромашно што полуде?“ се некои од коментарите на родителите.
Еден од вработените во вакво училиште одговорил дека таксата се наплаќа врз основа на релевантен јавен документ, но и дека учениците се слободни и да си одат дома на дремка.
Министерството за образование презеде различни мерки за основците и средношколците да спијат доволно во текот на денот. Во април 2021 година, Министерството издаде упатство со кое се бара од помалите основци да си легнуваат пред 21:20 часот, поголемите пред 22 часот и средношколците пред 23 часот, дури и ако не ја завршиле домашната задача навреме.
Наставата во основното училиште треба да започне по 8:20 часот, а наставата во средното образование по 8 часот. Училиштата не треба да бараат од учениците да дојдат на училиште порано од времето определено за групно учење и треба да обезбедат одредено време за дремка за учениците, се вели во упатството.
Училиштата, исто така, треба да го ограничат бројот на домашните задачи, така што учениците од основните училишта ќе можат да ги завршат сите домашни задачи на училиште, а средношколците ќе можат да завршат поголем дел од нив во кампусот, се вели во извештајот.
Љу Југанг, директор на одделот за основно образование во министерството, вели дека според анкетата на 77,14 милиони родители во декември, 76,2 отсто од испитаниците рекле дека нивните деца го добиваат препорачаниот сон од 10 часа секој ден.