Ако чувате мачка, имате двојно поголеми шанси за развој на шизофренија: Нови откритија на австралијанските научници

Нова прегледна студија сугерира дека оние кои имаат мачка како домашно милениче може да го удвојат ризикот од развој на нарушувања поврзани со шизофренија. Научниците од Австралија анализирале 17 студии од 11 земји објавени во последните 44 години, кои се занимаваат со оваа тема.

„Најдовме врска помеѓу поседувањето мачка и зголемената веројатност за развој на нарушувања поврзани со шизофренија“, вели психијатарот Џон Мекграт од Истражувачкиот центар за ментално здравје во Квинсленд. Идејата дека поседувањето мачка како домашно милениче може да биде поврзано со ризикот од шизофренија за прв пат беше претставена во студија од 1995 година, каде што научниците го наведоа паразитот Toxoplasma gondii како можна причина. Но, подоцнежните истражувања сугерираа други потенцијални причини.

Паразит Т. gondii

Истражувањата покажале дека престојот во близина на мачки во текот на детството може да предизвика поголема веројатност лицето да развие шизофренија; сепак, не сите студии ја нашле истата поврзаност. Затоа, Мекграт и неговите колеги анализирале неколку релевантни студии.

T. gondii е главно безопасен паразит кој може да се пренесе со јадење недоволно варено месо и контаминирана вода. Но, можеме да се заразиме со паразитот по каснување од мачка или контакт со измет од мачка. Се проценува дека околу 40 милиони луѓе во САД се заразени со овој паразит, обично без да покажат никакви симптоми, пишува Science Alert.

Кога T. gondii влегува во нашето тело, може да се инфилтрира во централниот нервен систем и да влијае на невротрансмитерите. Затоа, паразитот е поврзан со промени во личноста, психотични симптоми и некои невролошки нарушувања, вклучително и шизофренија.

По прегледот на 17 студии, научниците откриле „значајна позитивна поврзаност помеѓу широко дефинираното поседување на мачки и зголемениот ризик од нарушувања поврзани со шизофренија“. „По прилагодувањето на коваријаблите, откривме дека луѓето изложени на мачки беа со приближно двојно поголеми шанси да развијат шизофренија“, пишуваат истражувачите.

Напомена: Одреден број анализирани студии беа со низок квалитет и со различни резултати
Треба да се напомене дека 15 од 17 студии биле студии за контрола на случај. Тоа е студија во која пациентите и контролните субјекти ретроспективно се споредуваат во однос на застапеноста на потенцијалните фактори на ризик за појава на болеста. Овој тип на студија не може да докаже причина и последица и често не ги зема предвид факторите кои можат да влијаат и на изложеноста и на исходот.

Одреден број анализирани студии биле со низок квалитет и со различни резултати. Научниците затоа предупредуваат дека се потребни дополнителни и пообемни истражувања пред да се донесат конкретни заклучоци.

„Нашиот преглед само дополнително потврдува дека постои поврзаност помеѓу сопственоста на мачка и нарушувањата поврзани со шизофренија. Потребни се повеќе висококвалитетни студии засновани на големи, репрезентативни примероци за подобро да се разбере како поседувањето на мачката може потенцијално да влијае на менталните нарушувања“, наведуваат научниците во студијата.

Студијата, насловена како Cat Ownership and Schizophrenia-Related Disorders and Psychotic-Like Experiences: A Systematic Review and Meta-Analysis, беше објавена во списанието Schizophrenia Bulletin.