Мастилото од тетоважите се поврзува со лимфома и со рак на кожата: Колку е поголема шарата, толку е поголема опасноста

Тетоважата може речиси тројно да го зголеми ризикот од одредени видови на рак, барем така сугерира новото истражување спроведено на неколку илјади луѓе.

Данските и финските научници анализирале податоци од повеќе од 2.000 близнаци, споредувајќи ја стапката на тумори кај оние со тетоважи со стапката на оние кои немале тетоважи.

Тие откриле дека учесниците во студијата кои имале било каков вид на тетоважа, имале и до 62 отсто поголем ризик да им биде дијагностициран рак на кожата.

Но, за оние кои имале тетоважи поголеми од големината на дланката, ризикот од рак на кожата се зголемил за 137 проценти, додека ризикот од лимфом, вид на рак на крвта, се зголемил за неверојатни 173 проценти. Авторите на студијата велат дека нивните наоди се загрижувачки со оглед на зголемената популарност на тетовирањето меѓу европските народи, особено меѓу помладите генерации.

Се акумулира мастило во лимфните јазли

Според некои анкети, еден од четири лица во Велика Британија има барем една тетоважа, а иако нема точни податоци за кај нас, според она што го гледаме во текот на потоплите месеци во годината, но и според бројот на салони за тетовирање, може да се заклучи дека тетоважите од ден на ден се зголемуваат, особено кај младите.

Според гореспоменатата студија, оваа армија луѓе е изложена на значително зголемен ризик од рак на кожата и лимфом. Авторите на студијата веруваат дека тетоважите може да го зголемат ризикот од рак поради мастилото што влегува во крвотокот и се акумулира во лимфните јазли, жлезди кои се витален дел од имунолошкиот систем.

„Бојата може да дејствува како тригер за хронично воспаление и да доведе до абнормален раст на клетките и зголемен ризик од рак“, велат тие.

Можеме јасно да видиме дека честичките од мастилото се акумулираат во лимфните јазли и претпоставуваме дека телото го доживува ова мастило како туѓа супстанција. Ова може да значи дека имунолошкиот систем постојано се обидува да одговори на мастилото, но сè уште не знаеме дали тој постојан напор може да ја ослаби функцијата на лимфните јазли или има некои други здравствени последици – вели проф. Хенрик Фредериксен, еден од авторите на студијата и експерт за крвни нарушувања на Универзитетот на Јужна Данска.

Бројките се немилосрдни

За стручното списание BMC Public Health, авторите на студијата велат дека понатамошните студии треба да истражат дали некои специфични бои на мастилото играат значајна улога во зголемувањето на ризикот од рак. Иако забележале дека нивните податоци сугерираат дека тетоважите на кожата го зголемуваат ризикот од рак, тие признаваат дека, барем кога станува збор за ракот на кожата, постојат и други фактори на кои може да им се припише зголемен ризик.

Мастилото за тетоважа можеби не предизвикува рак, туку „само“ води до доцнење со поставувањето на дијагнозата па затоа би можела да биде поврзана со потешки, напредни стадиуми на рак на кожата. Ова е нешто што планираме да го истражиме подлабоко“, напишале тие.

Студиите со близнаци се сметаат за златен стандард за овој тип на истражување, бидејќи им овозможуваат на експертите да анализираат два субјекти со екстремно слична ДНК и потоа да го споредат влијанието на разликите во животниот стил меѓу нив.