Како што растат, децата придаваат сѐ поголемо значење на популарноста во нивната врсничка група. Истражувањата покажуваат дека помалку од 10 проценти од децата покажуваат желба да бидат популарни во првите три одделенија од основното училиште. Меѓутоа, со возраста, тој процент значително расте и го достигнува својот врв во периодот на раната адолесценција, помеѓу петтото и осмото одделение, кога популарноста во врсничката група станува еден од поважните приоритети.
Кои се популарните деца?
Популарните деца врсниците најчесто ги опишуваат како богати, згодни, добри во спортот, добро облечени или духовити. Како еден од битните елементи на популарноста се наведува нашата способност да се спријателиме и да се дружиме со другите популарни деца. Резултатите од истражувањето покажуваат дека постои разлика помеѓу децата кои се здобиваат со популарност преку „просоцијалното однесување“ и децата кои привлекуваат внимание кон себе преку „антисоцијалното однесување“.
Во првата група спаѓаат деца кои со своите добри комуникациски вештини успеваат да привлечат големо внимание меѓу своите врсници.
Во втората група често припаѓаат т.н „опасни момчиња“, кои можат да постигнат добри резултати во спортот, но имаат низок академски успех.
Според проценката на возрасните, децата од оваа група не се однесуваат на прифатлив начин, ги прекршуваат општествените норми и често запаѓаат во неволји. Во оваа група има социјално манипулативни момчиња и девојчиња кои комбинираат љубезност со „ниски удари“ во комуникацијата со своите врсници за да го подобрат својот социјален статус. Постои тенденција кон правење сплетки и омаловажување на „поинаквите“ деца.
Дали можеме да станеме популарни?
Децата често размислуваат за стратегиите за тоа како да станат попопуларни. Тинејџерите најчесто се обидуваат да достигнат „повисок статус“ со промени во облекувањето, излегување со спротивниот пол или дружење со популарни деца. Некои деца покажуваат бунт и склоност кон физичка агресивност. Меѓутоа, само затоа што имаме за цел да станеме популарни не значи дека тоа всушност ќе го промени нашиот статус.
Истражувањето на популацијата на деца од шесто одделение покажала дека зголеменото прикажување на агресивно однесување може да им донесе „поени“ на претходно популарните деца, но доколку децата кои не се популарни се обидат да ги применат истите стратегии, тоа нема да им помогне да ја постигнат посакуваната промена во статусот.
Дали е популарноста добра?
Да се биде во центарот на вниманието на групата врсници предизвикува силно чувство на моќ кај детето, но има и свои недостатоци. Истражувањата покажуваат дека популарноста често се поврзува со ризично однесување како пушење, употреба на дрога и рана сексуална активност. Дополнително, популарноста не значи дека сме сакани во нашата врсничка група. Едно истражување покажало дека само 9 отсто од популарните деца им се допаѓаат на нивниот поширок социјален круг. Фокусирањето само на популарноста може да доведе до нарушени односи со околината бидејќи детето се фокусира исклучиво на постигнување лични цели, запоставувајќи ги целите ориентирани кон заедницата.
Предлози за родителите
Немојте лесно да ги отфрлате грижите на вашето дете во врска со популарноста бидејќи тоа е многу важна тема за тинејџерите, во периодот кога своето место го бараат надвор од семејната средина. Разговарајте со вашето дете за животните вредности, нагласувајќи дека инвестирањето во пријателства е многу поважно од популарноста.