Пролетта пристигна, но наместо да ни го олесни станувањето, секое утро се будиме исцрпени, малаксани и без енергија. Експертите предупредуваат дека причина за тоа е добро познатиот „пролетен замор“, состојба која настанува поради хормоналните промени и побавното прилагодување на организмот кон новата сезона. Еве како да го препознаете и да го надминете
пролетниот замор.
Пролетниот замор, познат и како пролетна летаргија или пролетна астенија, е состојба на изразена исцрпеност, поспаност, малаксаност, апатија и лошо расположение што се јавува на почетокот на пролетта.
Пролетта пристигна, деновите се потопли и сончеви, а наместо ентузијазам и радост се чувствуваме уморни и без енергија. Ако ова ви звучи познато, не сте сами. Многу луѓе се соочуваат со симптоми на таканаречен пролетен замор или пролетна летаргија во овој период од годината.
Што е пролетен замор и зошто се јавува?
Пролетното сонце сјае, деновите се подолги, а сепак сте поспани, апатични, нерасположени, вознемирени или имате главоболки и болки во зглобовите. Оваа состојба е позната како синдром на пролетен замор, а експертите ја класифицираат како форма на сезонско афективно нарушување (SAD).
Вообичаените симптоми на пролетен замор вклучуваат: чувство на замор дури и по добар сон, недостаток на енергија, поспаност во текот на денот, главоболки, болки во зглобовите и мускулите, промени во расположението и тешкотии со концентрирањето.
Хормоните играат клучна улога
Една од главните причини за пролетен замор е исцрпувањето на резервите на серотонин, познат како „хормон на среќата“, кој е значително помал во текот на зимата. Исто така, мелатонинот, хормонот за спиење, е подоминантен во текот на зимата, а неговата концентрација се намалува побавно отколку што би сакале.
Така наутро сме поспани, уморни и исцрпени иако добро сме спиеле. Во текот на зимата резервите на серотонин се исцрпуваат и потребно е време и изложување на сончева светлина за повторно да се активира.
Алергиите се дополнително исцрпувачки
Пролетта дополнително го оптоварува организмот со алергии бидејќи растенијата цветаат и го зголемуваат присуството на алергени во воздухот, што дополнително може да влијае на нашиот замор. Причина може да бидат и блокаторите на хистамин што ги земаме за алергиите, кои нè прават уште попоспани.
Кој е особено чувствителен?
Кардиоваскуларните пациенти се особено подложни на пролетен замор поради температурните флуктуации, кои предизвикуваат скок на крвниот притисок наутро и опаѓање во текот на денот.
Затоа експертите советуваат овие лица да избегнуваат физичка активност наутро и навечер. Можат да ја приспособат и постоечката терапија во консултација со докторот, но никогаш самостојно.
Анемијата е чест придружник на пролетниот замор, особено кај помладите жени.
Поради исхраната во зимскиот период може да дојде до недостаток на железо во крвта и анемија. Препорачливо е да се направи тест на крвта за да се утврди вистинската причина за вртоглавиците и другите симптоми. Важно е да пиете доволно течности, идеално од 2 до 2,5 литри дневно.
Како да го надминете пролетниот замор?
Добрата вест е дека пролетниот замор постепено поминува додека нашите тела се прилагодуваат, обично во рок од неколку недели. Клучно е да се усвојат здрави навики:
Редовна, умерена физичка активност – се препорачува најмалку 20 минути на ден, почнувајќи со полесни активности како пешачење или возење велосипед.
Здрава исхрана – консумирајте повеќе свежо овошје, зеленчук, јаткасти плодови, сложени јаглехидрати и квалитетни протеини како риба.
Хидратација – пијте доволно вода и намалете го внесот на кафе бидејќи дополнително го дехидрира телото.
Добар сон – се препорачува 6 до 8 часа квалитетен сон, по можност легнување пред полноќ. Кратката попладневна дремка од 15 минути може да биде корисна.
Со примена на овие совети можете полесно и побрзо да го надминете пролетниот замор и целосно да уживате во убавото време кое доаѓа.