Недостатокот на овој витамин може да влијае на развојот на детето

Здравата и разновидна исхрана за време на бременоста и доењето ќе ви помогне да ги внесете повеќето витамини и минерали кои ви се потребни. Но, кога сте бремени или кога постои можност да забремените, особено е важно да земете додаток на фолна киселина.

Ова го намалува ризикот од проблеми со развојот на детето во раните недели од бременоста. Фолната киселина може да помогне да се спречат вродени дефекти познати како дефекти на невралната туба, вклучително и спина бифида. Ако не сте земале фолна киселина пред зачнувањето, треба да започнете веднаш штом ќе дознаете дека сте бремени.

Недостатокот на витамин Д има долгорочни последици не само врз здравјето на коските, туку и врз голем број метаболички процеси, како и за одржување на имунолошкиот одговор, циркулаторниот, ендокриниот и нервниот систем. Исклучителната улога на витаминот Д е забележана кај пациенти кои страдаат од автоимуни болести.

Покрај тоа, витаминот Д игра важна улога во растот и созревањето на јајце клетките и е исклучително важен за постигнување и одржување на бременоста. Неговaта суплементација е од суштинско значење за пациентите кои имаат проблеми со метаболизмот како што се дијабетес, отпорност на инсулин, синдром на полицистични јајници, метаболички синдром, нарушувања на тироидната жлезда и голем број автоимуни болести, како и за жени чии членови на семејството страдаат од остеопороза, вели доц. д-р. Ула Мартон, специјалист по гинекологија и акушерство и супспецијалист по гинеколошка ендокринологија и човечка репродукција.

Суплементацијата е исклучително важна бидејќи бремените жени се примарна средина за детето и сета епигенетика, настаните што се случуваат во текот на бременоста, ги одредуваат здравствените исходи за идната личност во текот на целиот нејзин живот, вели Мартон.

Што се препорачува да се зема?

Земањето мелатонин за време на бременоста има влијание врз ритамот на спиење на нероденото дете фетусот го усвојува ритамот на спиење на неговата мајка.

Витаминот Ц е важен за спречување на инфекции на уринарниот тракт, додека витаминот К го спречува крварењето кое може да се појави за време и по породувањето, што е многу важно. Витаминот Д е исклучително важен за невролошкиот развој на идното дете, витаминот Б е важен и за превенција од структурни малформации, нагласува докторката.
Еден од најдобрите начини да се избегне недостаток на витамини за време на бременоста е да се консумира урамнотежена исхрана со многу свежо овошје и зеленчук, здрави масти како омега-3 масни киселини и протеини.

Дополнително, за време на бременоста треба да земате пренатални витамини кои ги содржат сите потребни хранливи материи за правилен развој на бебето, специјално формулирани за трудници и содржат оптимални дози на витамини и минерали.

Железо во бременоста

Ако немате доволно железо, најверојатно ќе се чувствувате многу уморни и може да страдате од анемија. Иако го има во немасното месо, зелениот лиснат зеленчук, сувото овошје и јаткастите плодови, добра идеја е да се провери неговото ниво во крвта.

Несоодветното ниво на железо е проблем со кој се соочуваат многу жени, затоа е неопходна соодветна суплементација, вели Мартон.

Витамин Ц и калциум

Витаминот Ц ги штити клетките и им помага да останат здрави. Се наоѓа во широк спектар на овошје и зеленчук, а урамнотежената исхрана може да го обезбеди целиот витамин Ц што ви треба.

Слична препорака се однесува и на калциумот. Калциумот е од витално значење за формирање на коските и забите на бебето. Ако мислите дека не ви е доволно, разговарајте со вашиот гинеколог за тоа. Ќе добиете совет за исхрана и евентуално, неопходна суплементација.

Што после доењето

Докторката Мартон, исто така, истакнува дека при планирањето на бременоста, сите жени без никакво одлагање прифаќаат суплементи со витамини и минерали за да го обезбедат најдоброто за своето дете. За жал, вели таа, штом ќе заврши периодот на доење, често престанува грижата за адекватна суплементација.

Таа, исто така, забележува дека генерално никогаш не е препорачливо да прибегнувате кон суплементација самостојно, туку во консултација со лекар.