Ако сте израснати во средина каде што викањето и удирањето се нормални, мора да мислите дека мора да има подобар начин за воспитување на децата. Другата крајност е попустливото родителство, каде што има многу малку граници и мала или никаква дисциплина. Затоа, нежното родителство е можеби златната средина.
Нежното родителство се фокусира на четири клучни елементи: почит, емпатија, граници и разбирање. Во моментов е хит на социјалните мрежи, но всушност постои долго време.
„Нежното родителство стана тренд, но тоа е само друго име за она што ние го нарекуваме позитивно родителство во психологијата. Нема потреба од казни и негативизам ако имате добар однос со вашето дете, базиран на слушање и нежна комуникација“, објаснува психологот Ема Ситрон.
Така, на пример, наместо да му кажете на вашето дете: „Симни ги нозете од каучот“, покорисно е да му кажете: „Подобро да не ги ставаш нозете на каучот затоа што го валкаш, па ќе мора да ја перам прекривката“.
„Можете да укажете на последиците од одредено однесување, но нема потреба да го кревате гласот или да бидете негативни, односно да го казнувате детето бидејќи тоа само ја нагризува вашата врска, но и довербата и комуникацијата меѓу вас, додаде Ситрон.
Мајката Кели Медина Енос дошла до информации за нежното родителство кога нејзиниот син Џорџ имал 18 месеци. Таа веднаш го прифатила и споделува на ТикТок како да се практикува.
„Истражувањата покажуваат дека децата воспитани со нежен пристап подобро ги регулираат своите емоции и имаат помала веројатност да страдаат од депресија. Тие се емотивно поинтелигентни и способни да им ги пренесат тие чувства на луѓето. Но, јас не се зафаќам премногу со статистиката. Знам само дека функционира за мене и моето семејство“, посочува Енос.
Некои од нејзините совети до родителите кои се заинтересирани за овој вид родителски метод е да користат позитивен јазик, да им дадат на децата неколку опции секогаш кога е можно, да ги научат децата на техники за дишење, да научат да се справуваат со изливите на гнев на своето дете на смирен начин, т.е да почекаат тие да престанат и потоа да му понудат на детето прегратка, како и да не очекуваат дека нежното родителство е магичен метод со кој нема да има пречки.