Таткото на една ќерка раскажал дека е лут затоа што повеќето други родители ги осудуваат него и неговата сопруга затоа што немаат повеќе деца. Сè додека не станал родител, никогаш не помислил дека постои стигма кон родителите на едно дете.
Сопругата и тој имаат само едно дете и не се сигурни дали ќе имаат повеќе.
„Постојат многу големи шанси мојата ќерка да биде единец. И уморен сум од тоа како другите родители реагираат кога ќе сфатат дека имаме само едно дете”, рекол еден татко, додавајќи дека никогаш не му паднало на памет дека постои таква стигмс кон родителите на едно дете.
„Да си признаам, имав свои предрасуди за многудетните семејства. Мислев на кого му требаат толку многу деца и дека е тоа неодговорно. Но, не сфатив дека ова има и друга страна. Дека семејствата со повеќе деца ќе гледаат со презир кон мојата единствена ќерка, особено кон нашата одлука да имаме само едно дете“, додава тој.
Постои стереотип за единците, дека се разгалени, себични и осамени.
„Другите родители сакаат да ги дефинираат децата само со нивното отсуство на браќа и сестри, како да нема ништо друго вредно да се размислува за нив.
На прашањето: „Дали ја имате само неа?“, јас и мојата сопруга креваме раменици, бидејќи, да бидам искрен, не планиравме повеќе. Секогаш можете да ги видите родителите кои го прашуваат ова, како прават пауза и не знаат како да реагираат. Многумина се сожалуваат“, вели еден татко.
Разликите брзо станале очигледни, дури и за нивната ќерка.
„Таа се врати дома од училиште еден ден и рече дека е едно од трите деца во целото нејзино одделение кои немаат брат или сестра. Таа не го кажа тоа како обвинување. Тоа беше само необичен факт на кој таа сакаше да ни обрне внимание.
Рековме: „Во ред“. А потоа, не знаејќи зошто, ја погледнав ќерка ми и ѝ реков: „Извини.“ Таа ги крена рамениците и праша дали можеме да имаме куче“, вели тој и додава:
„Зошто почувствував потреба да кажам: „Жал ми е“? Дали мојата ќерка е должна да има брат или сестра? Дали сум лош родител што не ги координирав нашите репродуктивни циклуси со семејствата во нашето соседство? Дали моето дете е некој вид на лична изјава или себичен одраз на мојата желба за повеќе слободно време? Секако дека не. Само, се случило. Тоа е животот. Тоа би сакал повеќе родители да го разберат“, искрен е таткото.
Неговите предрасуди кон многудетните семејства исчезнале штом станал родител, па сака другите родители да не го осудуваат бидејќи има само едно дете.
„Другите родители не знаат дали сме совршено среќни со нашето едно убаво, среќно дете. Тие не знаат дали можеби со години се обидуваме за друго дете. Тие не знаат за стресот, медицинските третмани, неуспесите.Тие не знаат за дискусиите за посвојување, расправиите и финансиските проблеми. Не велам дека сето ова ни се случило, туку само сакам да кажам дека не би морал да се срамам затоа што имам само едно дете“, рекол таткото.
„Нашата ќерка не е разгалена, себична или осамена. Таа е брилијантна и слатка и сака да биде во близина на други луѓе… и би била исто толку прекрасна кога би имале уште десет деца. Затоа, ве молам, престанете да претпоставувате дека на моето единствено дете му недостасува нешто освен вашата емпатија“, заклучил таткото, пишува Your Tango.