Дали домашниот миленик и бебето можат заедно?

Безбедноста на децата е најважната работа во светот за многу новопечени родители. За жал, родителите кои имаат домашен миленик обично се склони да ги игнорираат нивните потреби или целосно да им забранат пристап до спалната соба која штотуку го примила својот најмлад станар.

Овој начин на размислување е многу старомоден. Покрај тоа, науката низ годините докажала дека е тоа и сосема погрешно.

Растење со домашен миленик
Резултатите од најновото истражување покажуваат дека домашните миленици, особено кучињата и мачките, можат многу да придонесат за здравјето на новороденчето. Ако вие и вашето домашно милениче сте заедно веќе некое време, вашиот организам станал отпорен на бактериите што миленикот ги внесува во домот. Мајките и татковците ги пренесуваат своите бактерии на своите потомци, па растењето со домашно милениче не е ни најмалку опасно.

Најдоброто нешто што можете да го направите е да му се посветите на вашето малечко без претерана грижа за неговото здравје. Децата кои растат со домашни миленици, особено со кучињата, се поздрави и емотивно поисполнети од децата кои растат без миленичиња.

Резултатите од финската студија спроведена на примерок од 397 деца кои биле систематски следени во периодот до првата година по раѓањето покажале дека децата опкружени со домашни миленици почесто страдаат од респираторни инфекции и настинки, но генерално се значително поздрави од децата кои растат без миленичиња.

Дури 30 отсто од децата кои имале редовен контакт со домашно милениче имале поблаги симптоми на кашлица, малку затнат нос итн. Покрај тоа, овие деца имале помала веројатност да страдаат од инфекции на увото и поретко им препишувале антибиотска терапија.

Огромното мнозинство научници се согласуваат дека е многу подобро детето да расте со домашно милениче отколку без него. Врската помеѓу детето и домашно милениче е особено важна во првата година од животот на детето, кога нашите најмлади само што влегуваат во светот околу нив.

Сè додека се грижите за здравјето и хигиената на вашето домашно милениче, нема причина да го одвоите од вашето новороденче, со кое би требало да развијат посебно и длабоко пријателство.