Дали имате дома тинејџер кој се буди секој ден со подочници и му се спие во текот на целиот ден?
Секој просечен тинејџер треба да спие од 9 до 10 часа секоја вечер, бидејќи додека спие се лачат хормоните одговорни за растот и половото созревање. Сепак, многу од нив не го прават ова, туку спијат во просек по околу 7 часа. Поради ова тие се раздразливи, депресивни и лошо расположени.
Спиењето е активност која е многу неопходна за нашето тело. Потребата за сон варира во зависност од возраста на детето, така што бебињата спијат многу подолго (16-18 часа на ден), децата од предучилишна возраст од 10 до 12 часа дневно, а на децата на училишна возраст и на тинејџерите им требаат до 9 часа сон.
Меѓутоа, тинејџерите често спијат 6 или помалку часа, што може да предизвика проблеми во извршувањето на секојдневните активности. Нарушување на спиењето е кога детето често се чувствува уморно поради проблеми со спиењето, поспано е и има тешкотии да се концентрира на учење. Покрај гореспоменатите тешкотии предизвикани од недоволното спиење, тинејџерите кои не спијат доволно имаат поголема веројатност да бидат дебели, да се чувствуваат несреќни и да имаат проблеми со комуникацијата.
Тешкотиите со спиењето особено се јавуваат во адолесценцијата. Ритамот на спиење и будност кај адолесцентите е различен од оној на возрасните. Тинејџерите често легнуваат доцна и имаат потреба да спијат подолго време.
Истражувањата покажуваат дека тинејџерите често играат видеоигри до доцна во ноќта, сурфаат на Интернет или испраќаат СМС пораки пред спиење, што може да доведе до проблеми со учењето, промени во расположението, анксиозност и депресија, а во исто време да предизвика нарушување на спиењето и сонот. Исто така, тинејџерите кои користат медиуми пред спиење се повеќе склони кон развој на растројство на хиперактивност со недостаток на внимание. Момчињата почесто играат видео игри пред спиење, додека девојчињата повеќе пишуваат пораки. Овие дејства ја стимулираат активноста на мозокот и го потиснуваат нормалниот циклус на спиење. Тинејџерите често ги будат известувања дека добиле СМС порака или дека некој од нивните пријатели објавил нешто на социјалните мрежи, им пратил порака и слично. На овој начин се прекинува сонот на тинејџерите, се попречува спиењето и се зголемува заморот следниот ден.
За да воспоставите правилен ритам на спиење, би било добро вашиот тинејџер да спие и да се буди секој ден во исто време. Истото важи и за викендите. Важно е да не консумира чај, кафе или чоколадо пред спиење бидејќи овие производи не делуваат добро на сонот. Нека ја проветрува просторијата пред спиење, а добро би било собата на тинејџерот да биде и добро затемнета и да се избегне каква било бучава. Звукот на телевизорот или компјутерот може да го вознемири да не заспие.
Вашиот тинејџер исто така ќе има проблеми со спиењето ако го мачи нешто што се случило во текот на денот. Разговарајте со него/неа ако видите дека е немирен, обидете се да откриете што е проблемот и дали можете да помогнете.
Охрабрете го вашиот тинејџер да си легне порано, обезбедете му мир, поттикнете го да не користи гаџети пред спиење бидејќи на тој начин ќе има големи проблеми со спиењето и нормално функционирање следниот ден. Извадете ги телевизорот и компјутерот од неговата соба, воспоставете правила за користење на техничките уреди.
Имајте на ум дека континуираното вежбање, како и 30 минути изложување на сончева светлина дневно, придонесува за квалитетен сон, па затоа насочете го вашиот тинејџер и кон овие активности. Бидејќи спиењето е од суштинско значење за нашето здравје и нормално функционирање, а за младиот организам особено за раст и развој, помогнете му на тинејџерот да избегне нарушувања на спиењето и да биде активен и одморен во текот на денот.