Дали се посреќни во бракот партнерите врсници или оние со разлика во годините

Во денешно време, кога љубовта сѐ помалку се врзува за бројките, прашањето за идеалната разлика во годините станува сѐ поинтересно.

Се сеќавате ли на култната реплика од филмот „Месечината е тажна“: „Зарем никогаш не си слушнал дека девојката треба да биде помлада од мажот за половина од неговите години, плус седум.

Во тоа време, Пети О’Нил, која има 22 години, му се додворува на 30-годишен маж и се радува што оваа математичка формула совршено се вклопува во нејзиниот романтичен подвиг (30 : 2 + 7 = 22). Ова поранешно златно правило денес предизвикува смеа, но и го наметнува прашањето: дали воопшто постои идеална разлика во години за бракот или тоа е само уште една социјална конструкција?

Колку разликата во годините навистина игра улога?

Во светот на љубовта и врските, разликата во годините често се гледа како тема која предизвикува бројни дискусии и предрасуди. Додека некои парови откриваат дека значајната разлика во возраста може да влијае на нивната врска со текот на времето, други се убедени дека она што ги прави компатибилни далеку ја надминува разликата во годините.

Ако ги прашаме експертите, нема дебата.

Нивниот став е едногласен: разликата во годините е значаен фактор во романтичните врски. Бренди Порше, лиценцирана терапевтка, во написот „Разликата во годините во врските: Колку е премногу“?, истакнува дека „дури и мала разлика во возраста, како на пример 4 до 5 години, може да открие различни нивоа на зрелост“.

Кога постои значителен јаз во возраста, како што се 10 до 15 години или повеќе, животните искуства може да бидат драстично различни.

Џина Мари Гуарино, советник за ментално здравје, додава во гореспоменатата статија: „Колку е поголема разликата меѓу партнерите, толку е поголема веројатноста врската да се соочи со предизвици поврзани со животните фази“.

Овие предизвици може да вклучуваат разлики во:

здравјето

нивоата на енергија

животните приоритети

плановите за основање семејство

Идеална разлика во годините – според науката

Студијата објавена во 2017 година покажала дека паровите со поголема разлика во возраста можеби не уживаат во бракот колку што би очекувале.

Излегува дека паровите со помали разлики, особено оние кадешто е мажот постар само неколку години, имаат најголеми шанси за долг и среќен брак.

Колку е поголема разликата, толку со текот на времето се намалува задоволството во врската: Паровите со големи разлики во возраста се соочуваат со побрзо опаѓање на задоволството во врската во текот на првите 6 до 10 години од бракот во споредба со паровите кои се на слична возраст.

Паровите во кои мажот е 1 до 3 години постар се најчести и најзадоволни во врската. Задоволството од врската малку се намалува кај парови со разлика од 4 до 6 години, а овој пад продолжува кај парови со разлика од 7 или повеќе години.

Интересни резултати доаѓаат и од Кореја!

Истражувањето од 2015 година покажало дека паровите кои се родени во иста година имаат најмалку проблеми со депресија, додека оние со разлика од 3 години или повеќе имаат малку поголема стапка на депресија.

Можеби тоа чувство на припадност на истата генерација е она што прави разлика.

Звучи логично, нели? Кога сме на слична возраст, полесно е да се разбереме и да се поврземе на емоционално ниво.

Иако истражувањата шепотат дека разликата од 1 до 3 години е како создадена за љубов – важно е да се запамети дека статистиката само укажува на обрасци во врските, а не поставува цврсти правила.

На крајот на денот, најважно е да најдете партнер со кој споделувате исти вредности и со кој се согласувате!