Кога имаат 13-14 години, децата почнуваат да ги молат родителите да ги пуштат да одат на одмор со другарите.
Според експертите, тоа е нормално бидејќи децата на таа возраст сакаат да бидат независни и да се чувствуваат како возрасни.
На таа возраст расте потребата на децата за неконтролирана забава и ненадгледувано дружење, што ги наведува родителите до размислување кога е време за нивниот прв самостоен одмор.
Не се сите деца исти
Децата се различни, како и нивните семејства и средината од која доаѓаат.
Се зависи од тоа колку детето е социјализирано, способно да функционира нормално во друштво на врсниците, да се снаоѓа во разни ситуации и да се грижи за себе.
Психотерапевтите објаснуваат дека некои деца се зрели веќе на 15 години, а некои ниту на 18 не можат да функционираат без родителски надзор и помош.
Повеќето тинејџери се подготвени за самостоен одмор само на возраст од 17-18 години, по завршувањето на трети или четврти клас од средното образование.
Смислата на адолесценцијата е напуштање на семејството и промена на семејните врски.
Овие врски не се прекинуваат, туку добиваат нови форми и димензии.
Адолесцентите си го бараат своето место во општеството, а самостојните одмори можат многу да помогнат во тоа.
Знаењето и чувството дека се снашле сами во тие десет дена одмор значи многу за тинејџерите. Родителите треба да разговараат и да го испитаат односот на нивните деца кон самостојниот одмор.
Треба да го прашаат детето каде и со кого сака да оди и што очекува.
Така полесно ќе се утврди дали детето е подготвено да оди на одмор.
Направете компромис
Ако можете, идеално е да направите компромис.
Оставете го вашето дете да оди на одмор со спортскиот клуб или училиштето за странски јазици. Детето ќе мора да се снаоѓа без родители, но сепак ќе биде под надзор на тренер или учител.
Не му држете предавања на вашето дете
Родителите најмногу се плашат дека ако нивните деца одат сами на море, ќе почнат да пушат, да пијат, да се дрогираат и да се впуштаат во ризични сексуални односи.
Нормално е родителите да се грижат за своето дете, но не треба да се преоптоваруваат.
Ако детето сака да направи нешто лошо, тоа ќе го направи и дома.
Пред патувањето, на детето треба да му се дадат основни совети како да се заштитат и да се однесуваат во случај на несреќа или болест.
Предавањата за опасности, дрога, цигари, алкохол, тепачки и секс не треба да се држат во последен момент.
Ако пред патувањето не сте му објасниле на вашето дете дека не треба да пие и да пуши, колку се опасни дрогите, да избегнува кавги и ризичен секс, тогаш разговорот пред самото патување нема смисла.
Не го барајте вашето дете неколку пати на ден
Ако веќе сте му дозволиле на вашето дете да оди на одмор, не треба да му се јавувате секој час, да проверувате што прави, дали јадело, кога оди да спие и кога станува.
Доволно е вашето дете да ве контактира кога ќе пристигне на својата дестинација и уште неколку пати за време на неговиот одмор.
Во спротивно, ако постојано го контролирате, годишниот одмор ќе се претвори во „кошмар“ и за вас и за него.