Патронажните сестри во Данска готват ручек и перат алишта за семејствата по породувањето

Во Холандија и Данска, секоја мајка има законско право на помош од краамзорг, односно негувателка во текот на првата недела по породувањето. Овие обучени професионалци обезбедуваат широк опсег на помош, така што помагаат во доењето, хранењето, хигиената и општата грижа за мајката и бебето. Негувателката ги посетува новите родители секој ден, минимум еден ден, а најмногу десет дена, нудејќи не само практична помош туку и емоционална поддршка додека семејството се прилагодува на животот со новороденче.

Што е краамзорг?
Краамзорг, или негувател по породувањето, е обучен професионалец кој им дава поддршка на мајките и нивните бебиња по породувањето, нешто како патронажните сестри кај нас. Овие луѓе играат клучна улога во советувањето и пружањето практична помош во однос на доењето, хигиената и општата грижа за мајката и бебето. Тие, исто така, обезбедуваат емоционална поддршка за да го олеснат прилагодувањето на семејството на животот со нов член.

Системот краамзорг има историски корени во традицијата на раѓање дома и со текот на годините стана формален и професионален систем за поддршка. Негувателите минуваат низ теоретска и практична обука и редовно се обучуваат за да бидат во тек со најновите практики во грижата за мајките и доенчињата, а нивните услуги се покриени со здравственото осигурување.

Присуството на краамзорг во домот обезбедува утеха и олеснување за новите родители, но служи и како превентивна мерка помагајќи да се идентификуваат потенцијалните здравствени проблеми или знаци на злоупотреба и семејно насилство.

Обезбедуваат услуга и за извршување на дополнителни домашни работи
Негувателите по породувањето во Холандија и Данска исто така обезбедуваат дополнителни услуги како што се перење алишта и подготовка на оброци. На пример, тие можат да ја исчистат куќата, да перат алишта и да подготвуваат оброци за семејството за време на нивниот престој. Ова зависи од индивидуалниот договор помеѓу краамзоргот и семејството и може да варира во зависност од нивните желби и потреби.

Иако системот е високо ценет, Холандија и Данска во моментов се соочуваат со недостиг од негуватели. Сепак, со оглед на големата вредност што ја дава, краамзорг останува клучен елемент на постпородилната нега во овие две земји.