Пазете со кого се разведувате! Нарцис и психопат или нормална личност, не е сеедно!
Ивана Синџиќ, дефектолог и семеен психотерапевт од Србија пишува за тешките и болни процеси на разводите и за тоа дека тие во голема мера зависат и од тоа од кого се разведувате, од нарцисоидна и психопатска личност или од нормален човек. Најдобра превенција, вели, е да пазите со кого стапувате во брак
Се разбира, разводот сам по себе е тежок, слоевит и болен процес. Денес тоа веќе не се смета за грешка во нашето животно CV и човекот треба да биде подобар после една и пол до две години и да може да продолжи понатаму, вели Ивана Синџиќ, дефектолог, национално и европски сертифициран семеен психотерапевт и EMDR психотерапевт од Србија поучена од она што го научила за разводот на бракот низ психотераписката пракса.
„Вистина е дека и во разводите има огромни разлики во зависност од тоа од кого се разведувате.
Работев и работам со многу жртви кои најдоа сила да излезат од брак со нарцисоидни и психопатски личности. Меѓутоа, ако нешто научив за разводот од и онака многу богатата психотерапевтска практика, тоа е дека кога жртвите ќе најдат сила да се ослободат од таквите бракови, проблемот често опстојува со години по разводот.
Бидејќи овие структури на личност не престануваат да ја малтретираат жртвата (сега преживеан што се опоравува). Тие дополнително го прават тоа преку:
Обидите да ги свртат децата против бившиот партнер, а за жал многумина успеваат во тоа.
Ширењето лоши гласини за поранешниот сопружник каде и да можат.
Со поднесување тужби за се и сешто против поранешниот партнер, за овој преживеан никогаш да не може да се ослободи од судот и чувството на вина што инаку го трпел во бракот.
Испраќање пораки до поранешниот партнер или членовите на неговото пошироко семејство во кои тој продолжува да го прозива поранешниот партнер за: вина, лошо родителство, неморално однесување или да го понижува поранешниот партнер на различни начини.
Се обидува да му „среди“ отказ на својот поранешен сопружник или да му ја уништи работата.
Преживеаните од такви бракови често ме прашуваат: Ивана, кога ќе престане ова малтретирање? Се разведов пред 3 или 5 години?
Вистина е дека психопатските или нарцисоидните структури на личноста тешко се откажуваат од сопственоста над жртвата и дека нивната неподготвеност да ја пуштат жртвата се рефлектира во нивната желба да го одржат измачувањето на поранешниот партнер дури и долго време по разводот. Во ваквите постразводни постапки се гледа и нивната деструктивност која е поголема отколку кај здрава личност, како и желбата да се остане некако поврзан со жртвата преку тие деструктивни и долги пост-разводни процедури.
Не гледам подобар лек за ова од превенција во смисла: пазете со кого стапувате во брак, бидејќи од тоа со кого сте биле во брак зависи и тоа на кој начин ќе се разведете“, вели Синџиќ.