Кон крајот на 2024 година, Pew Research Center ja објави најновата анкета за американски тинејџери на возраст од 13 до 17 години, која покажа дека и покрај постојаната загриженост за влијанието на социјалните медиуми врз менталното здравје на тинејџерите и различните ограничувања, тинејџерите продолжуваат да ја користат технологијата речиси исто како и порано.
Речиси половина од нив изјавуваат дека се онлајн „скоро цело време“.
Иако секојдневната употреба на популарните социјални платформи како YouTube, TikTok и Snapchat е малку намалена во споредба со 2023 година, поголемиот дел од тинејџерите сè уште користат YouTube секојдневно (90%), по што следи TikTok (63%), а многумина исто така секојдневно ги проверуваат Instagram или Snapchat.
Јасно е дека технологијата и социјалните мрежи ќе продолжат да играат значајна улога во животот на тинејџерите во 2025 година. Наместо наметнување ограничувања, на тинејџерите ќе им треба поддршка во градењето здрав однос со технологијата. Донесуваме три клучни технолошки трендови и совети кои можат да им помогнат.
Доминација на YouTube
YouTube останува најпопуларната социјална платформа меѓу тинејџерите. Иако TikTok и Instagram се користат за кратки видеа, постои забележлив тренд кон подолги видеа на YouTube, каде што тинејџерите консумираат и забава и едукација.
Американската психолошка асоцијација ја нагласува важноста на улогата на возрасните во усмерувањето на тинејџерите во консумирањето на видео содржини.
Некои клучни совети вклучуваат:
Ограничете ја изложеноста на штетна содржина како насилство или ризично однесување
Поттикнувајте изложеност на позитивна содржина која промовира љубезност и благосостојба
Помогнете им на тинејџерите да најдат точни информации за здравјето
Насочете ги кон содржини кои моделираат здрави односи
Следете го влијанието на онлајн инфлуенсерите и погрижете се тинејџерите да го разберат нивното влијание врз самодовербата
Управувајте со времето поминато на екранот со поттикнување офлајн активности.
Подем на вештачката интелигенција (ВИ)
ВИ ќе биде составен дел на повеќето платформи што ги користат тинејџерите во 2025 година, од YouTube до TikTok.
Како што тинејџерите се повеќе комуницираат со вештачката интелигенција, од клучно значење е тие да разберат како таа функционира и да ги препознаат потенцијалните ризици.
Неодамнешната тужба против компанија за вештачка интелигенција ги истакна опасностите од претерано потпирање на вештачката интелигенција за емоционална поддршка.
Еве како можете да им помогнете на тинејџерите снаодливо да користат вештачка интелигенција:
Научете ги да препознаваат и проверуваат дезинформации генерирани од вештачката интелигенција
Објаснете им како вештачката интелигенција ја персонализира содржината врз основа на нивните податоци и преференци и како тоа може да ја ограничи нивната изложеност на различни содржини
Поттикнете ги да бидат свесни за приватноста на податоците и како да управуваат со поставките за приватност
Едуцирајте ги за етичката употреба на вештачката интелигенција, особено во креативните индустрии
Предупредете ги на ризиците од потпирање на вештачката интелигенција за емоционална поддршка наместо на вистински човечки односи.
Еволуција на социјалните мрежи
Социјалните мрежи стануваат се повеќе фокусирани на забава и едукација, а помалку на лични врски.
Многу тинејџери сега користат платформи како TikTok и YouTube како пребарувачи и често ги заобиколуваат традиционалните пребарувачи како Google.
Меѓутоа, содржината која ја создаваат корисниците може да шири дезинформации, особено во врска со здравствените теми.
Тинејџерите исто така купуваат, се занимаваат со брендови и истражуваат креативна содржина на платформи како Instagram и Pinterest.
Бидејќи TikTok се соочува со можни забрани, родителите треба да разговараат за промените во социјалните медиуми:
Разговарајте за прашањата за приватност и национална безбедност, особено во врска со TikTok
Прашајте ги тинејџерите како бараат информации на интернет и кои платформи ги користат
Разговарајте за целта на секоја платформа што ја користат, можеби ќе се изненадите.
За родителите кои имаат потешкотии да бидат во тек со овие трендови, образованието за дигитална писменост во училиштата е клучно решение.
Многу училишта почнаа да ја интегрираат дигиталната писменост во нивната наставна програма, но се уште има многу работа.
Учењето на тинејџерите како безбедно и одговорно да ја користат технологијата е клучно за нивната успешна навигација во иднина.