Водич низ тантрумите според возраста на детето: Истиот метод нема да делува исто кај двегодишни и кај четиригодишни деца

Изливите на бес кај децата се најчести на возраст од 2 до 5 години, но тие можат да започнат уште од една година и да продолжат до предучилишна возраст.

920

Изливите на бес се исцрпувачки и за децата и за родителите, а начинот на нивното смирување зависи од возраста на детето.

Иако не постои единствена дефиниција за тоа што е излив на бес или како што уште се нарекуваат, тантруми, тој може да се сфати како интензивен, емоционален излив што навидум доаѓа од никаде. Секогаш вклучува комбинација од внатрешни стресови (на пр. глад, замор, фрустрација итн.) и надворешни стресори (на пример, преминување од забавна активност на помалку забавна), а способноста на детето ефективно да се справи со дадената ситуација е ниска или непостоечка.

Овие ситуации се најчести на возраст од 2 до 5 години, но тие можат да започнат уште од една година и да продолжат до предучилишна возраст.

Изливи на бес на возраст од 1 до 2 години

Тантрумите главно вклучуваат плачење и физичка манифестација како што е фрлање на земја, удирање со нозете и рацете на подот или фрлање на некој предмет. Најдоброто нешто што треба да го направите на оваа возраст за да го смирите детето е да го земете во раце и да го утешите.

Исто така, функционира и пренасочувањето на вниманието од она за што детето е вознемирено на нешто друго. На пример, ако е луто затоа што не му дозволувате да истражува небезбеден предмет или област, пренасочете му го вниманието на алтернативен предмет или област што е безбедна.

Тантруми на возраст од 2 до 3 години

Како што вашето бебе полека расте, меморијата и когнитивните способности се развиваат, така што пренасочувањето на вниманието повеќе не е толку ефикасен метод за смирување на бесот. Меѓутоа, со подобрената меморија доаѓаат поразвиени јазични вештини кои им помагаат на малите деца да ги процесираат и поефикасно да ги изразат своите емоции.

Именувањето на емоциите на вашето дете и сочувствувањето со она за што е вознемирено, го учи дека кога ќе ги изразат своите чувства со зборови, ќе ги задоволите неговите потреби и подобро ќе го разберете. Децата на оваа возраст, исто така, може да бараат од вас да ги држите за да ги смирите бидејќи физичката агресија достигнува врв на оваа возраст.

Тантруми на возраст од 3 до 4 години
На оваа возраст, вашето дете треба да стане повешто во вербалното изразување на своите чувства, но сепак му треба помош за регулирање на чувствата, дури и ако изгледа дека ја одбива вашата помош кога има излив на бес.

Дајте му време и простор да се смири, бидејќи ова е многу корисна техника на оваа возраст. Во исто време, погрижете се да знае дека сте тука за него така што ќе го прегрнете ако сака утеха.

Тантруми на возраст од 4 до 5 години
Кога вашето дете ќе наполни 4 и 5 години, треба да може да ги изрази своите чувства со зборови, како и да развие алатки кои ќе му помогнат да се смири.

Децата на оваа возраст може да се научат да користат вежби за дишење, прогресивна релаксација, едноставни јога пози и други стратегии за самоконтрола доколку почнат да се чувствуваат фрустрирани, лути или вознемирени. Поставувањето „ќоше за смирување“ или посебно место каде што вашето дете може да оди секогаш кога треба да се смири, може да биде корисно на оваа возраст.

Повеќе