Експертите предупредуваат на навиката на возрасните која води до послаб говор на децата

Децата поминуваат сè повеќе време пред екраните, а експертите предупредуваат на загрижувачките ефекти од оваа навика врз нивните основни вештини и развој.

Многу родители им дозволуваат на своите деца да користат мобилни уреди, но важно е да се следи колку време поминуваат на нив, вели Танит Карј, експерт за родителство.

Бебињата и малите деца често брзо се смируваат кога ќе им се покаже екран, кој полека еволуираше во „уред за смирување“.

Меѓутоа, експертите предупредуваат дека тоа не е вистинскиот начин за развој на децата и дека премногу време поминато пред екраните може негативно да влијае на нивниот напредок.

Мобилните уреди не се добри за развојот на децата

Иако многу родители забележуваат како светлите бои и подвижните слики на екраните го привлекуваат вниманието на децата, експертите предупредуваат дека ова не е добар начин за учење.

Според новото истражување, сè повеќе деца кои поаѓаат во училиште немаат развој на основни вештини како што се способноста да зборуваат, да ги разбираат зборовите и правилно да ги користат книгите.

Исто така, истражувањата покажале дека 32 отсто од децата не можат да држат молив или боичка поради недостаток на мускулна сила и слабо развиена моторика.

Психологот д-р Арик Сигман тврди дека родителите често користат екрани поради преоптовареност со работа и недостаток на поддршка од семејството.

„Учењето да се користи технологијата од млада возраст не се покажало корисно“, додава Сигман. Експертите за детски развој нагласуваат дека децата треба да научат како да се дружат и да ги развиваат јазичните вештини преку интеракција со возрасни и врсници, а не преку пасивно гледање на екранот.

Негативни влијанија

Доколку децата поминуваат премногу време пред екраните и немаат квалитетни интеракции со родителите, тоа може негативно да влијае на нивниот развој.

Истражувањата, меѓу другото, покажуваат и дека децата се збунети и под стрес кога родителите премногу гледаат во своите телефони, а губењето на врската може да има долгорочни последици за чувството на сигурност и за социјалните вештини на детето.

Иако е олеснување кога ќе видите дека малите деца престануваат да плачат кога им се дава мобилен уред, тоа може да значи и дека пропуштаат важна можност да научат како да ги саморегулираат своите емоции, што е клучно за нивните идни успешни и среќни врски. „Родителите треба да ги следат советите на Светската здравствена организација и да го ограничат времето на екранот за деца под две години“, вели психологот.

Некои земји, како Шведска, веќе воведоа јасни упатства за родителите. Наместо да им даваат на децата мобилен уред или лаптоп, психологот д-р Зигман вели дека најдобрите подароци кои можат да им ги дадат бабите и дедовците, се нивното време и поддршката за родителите во нивното воспитување.