Технологијата напредуваше невидено во последните неколку децении. Иако сè што е „старо“ е и малку „заостанато“, изгледа дека токму таа заостанатост ќе ни треба и ќе сакаме да ја вратиме.
Секој тинејџер сигурно слушнал од своите родители реченици кои зборуваат за старата, односно, за „нашата“ технологија. Сите слушаат и превртуваат со очи како денешните родители немале мобилни телефони, паметни телефони, компјутери и се забавувале и без нив.
Исто така, знаеме да им кажеме и дека сме немале телевизија „на изволте“, ниту пак можевме да слушаме музика освен ако не купиме некој носач на звук или не вклучиме радио.
На денешните генерации деца изгледа дека им е веќе преку глава од такви искуства и не сакаат да мислат дека се полоши од нас. Секако, она што го зборуваат нивните родители не е она што ќе го послушаат. Но, нешто друго е неочекувано од наша, родителска страна. Генерацијата Z е презаситена од модерната технологија! Како го знаеме ова? Наидовме на бројки кои го покажуваат и докажуваат тоа.
Компанијата за аудио-визуелно искуство и брендирање „Стартл“ направи мало истражување, пренесува „Scary Mommy“, кое открило дека вртоглаво расте цената на некои модерни албуми на касета што се продаваат на британскиот eBay, а цената дополнително се зголемува преку препродажба. Во просек, овие касети сега се продаваат за двојно поголема цена од оригиналната малопродажна цена, а најбараните наслови се продаваат за повеќе од десет пати повисока од оригиналната цена.
Да, на почетокот „музиката“ беше многу скапа, потоа поевтина, потоа бесплатна, а сега се движиме кон повторно зголемување на цените. Не е невообичаено сè да „кружи“. Малите серии, брзата продажба и постојаниот интерес на клиентите ги зголемуваат вредностите.
Истражувањето покажало дека албумите од 2000-тите во моментов имаат највисока вредност за препродажба, во просек 67 евра. По нив следат албумите од 2010-тите (58 евра) и 2020-тите (46 евра). Сепак, некои сегашни поп-ѕвезди како Морган Волен, Кендрик Ламар и Тејлор Свифт се на врвот на листата во однос на продажбата на касети. Некои од овие касети се продаваат за дури 200, 300 евра.
Ако Тејлор Свифт има касета, тогаш знаеме дека тоа е нешто на кое не потрошила пари залудно! Во Велика Британија, продажбата на касети се зголемила за 204% во првиот квартал од 2025 година. Во истиот период, пребарувањата за терминот „касетофон“ сега надминуваат речиси 20.000 месечно.
Па, ако вашиот тинејџер ве замоли за вокмен за Божиќ, можеби не било толку без врска и бесмислено. Изгледа дека конечно им е доста од технологијата!
Ни се допадна една реченица што ја прочитавме, која вели дека пред две децении луѓето го користеле интернетот за да избегаат од реалноста, а сега ни е потребна реалноста за да избегаме од интернетот.
Ако вокменот е спасот – нема проблем, да пробаме да си го најдеме прво нашиот и да провериме во каква состојба е.