Крај на стереотипите: Светски ден на лицата со Даунов синдром

Светскиот ден на лица со Даунов синдром се одбележува секоја година на 21 март – симболично избран датум поради трите копии на 21-от хромозом (трисомија 21) што се присутни во клетките на лицата со оваа состојба.

Овој ден Обединетите нации го слават од 2012 година. Темата за оваа година е „Крај на стереотипите“. Нејзината цел е да се бори против постоечките идеи за луѓето со Даунов синдром, какви би можеле да бидат или што би можеле да прават.

За почеток,  родителите на ваквите деца ширум светот апелираат до медицинските лица наместо „Жал ми е“, пред да им ја соопштат дијагнозата да велат: „Честитки“!

„Високи штикли“ и шарени чорапи

По повод Светскиот ден на лицата со Даунов синдром 21 март, денеска се носат шарени чорапи и ноктите се лакираат во различни бои за да се покаже солидарност со лицата со Даунов синдром и истовремено да се подигне свеста на јавноста за односот кон луѓето со Даунов синдром.

Иницијативата да се носат шарени чорапи на овој ден започнала од организацијата наречена „Даун Синдром Интернешнл“ за да ги поттикне луѓето да почнат да зборуваат за различности, уникатност, вклучување и прифаќање.

Секоја година, Светскиот ден на Даунов синдром се одбележува за да се подигне свеста за дискриминацијата со која се соочуваат лицата со Даунов синдром. Сите треба да се здружиме за да создадеме единство во различноста и да ја прифатиме убавината на индивидуалноста.

Светскиот ден на Даунов синдром, исто така, ги слави достигнувањата и придонесот на луѓето со Даунов синдром во промовирањето на нивната независност и цел.

Што е Даунов синдром?
Даунов синдром значи дека личноста е родена со дополнителен хромозом.

Оваа генетска состојба обично влијае на способностите за учење и физичките карактеристики на една личност.

Се јавува природно и нема позната причина.

Луѓето родени со него обично добиваат дополнителен хромозом случајно, поради промена во сперматозоидот или јајце клетката пред раѓањето.

Зстапен е во сите делови на планетата и како резултат на тоа често има променливи ефекти врз стиловите на учење, физичките карактеристики и здравјето, велат од ОН.

Според организаторите на Светскиот ден на Даунов синдром, едно на секои 800 бебиња ќе ја има оваа состојба.

Постојат три вида: трисомија 21 (кој е најчест тип – каде што има три копии од 21-от хромозом), транслокација и мозаицизам.

Синдромот го добил името по д-р Џон Лангдон Даун, кој прв го категоризирал.

Пет знаци на Даунов синдром

Физичките знаци вклучуваат:

Изгледот на лицето е посплескан, особено мостот на носот;
Очите во облик на бадем искосени нагоре;
Краток врат;
Една линија на дланката;
Пониска висина кај деца и возрасни.

Може ли да се лекува Даунов синдром?

Квалитетот на животот на лицата со Даунов синдром може да се подобри со редовни прегледи

Овој синдром не може да се лекува.

Помош може да се обезбеди врз основа на физичките и интелектуалните потреби, силите и ограничувањата на секое лице.

Соодветниот пристап до здравствена заштита, програмите за рана интервенција и инклузивното образование, како и соодветното истражување, се клучни за растот и развојот на поединецот, велат од ОН.

Квалитетот на животот на луѓето со Даунов синдром може да се подобри со задоволување на нивните здравствени потреби, додаваат тие.

Ова може да вклучува редовни контроли кај медицинските работници за следење на менталното и физичкото здравје и обезбедување навремени интервенции како што се физиотерапија, работна терапија, логопед, советување или специјална едукација, објаснуваат експертите.

Ова го подобрува нивното учество во општеството и исполнувањето на нивниот личен потенцијал.

Многумина со Даунов синдром завршуваат училиште и работат

Многу од нив успеваат да живеат квалитетно, одат во редовни училишта и работат, а некои од нив се венчаваат и живеат самостојно.

Некои успеваат да обезбедат истакнати работни места, како што е Мар Галсеран во Шпанија, која е избрана за член на регионалното собрание на Валенсија на истокот на земјата.

Се верува дека таа е првиот човек со оваа состојба што влезе во европски регионален или национален парламент.

Тука е и Ели Голдстајн, која влезе во историјата како прва манекенка со Даунов синдром која ја краси насловната страница на магазинот „Вог“ и покрај тоа што лекарите рекле дека никогаш нема да може да оди или да зборува бидејќи го има овој синдром.

Хајди Кроутер е британска активистка за лицата со попреченост која има Даунов синдром и го оспорува законодавството кое дозволува фетусите со оваа состојба да бидат абортирани пред раѓањето.

Таа успеа да го поднесе сопствениот случај пред Европскиот суд за човекови права, тврди дека постојните правила се дискриминаторски.