Ако раката е рака, зошто вагината е смоквичка, а пенисот – зајко?Децата треба да ги научат вистинските зборови за интимните делови од телото

Експертите нагласуваат дека нема причина родителите да не водат сериозни разговори со своите деца. Напротив, ги препорачуваат од многу причини. Меѓу другото, тие сметаат дека секој родител уште од најмала возраст треба да го научи своето дете на правилни зборови за именување на интимните делови од телото, што повеќето родители не го практикуваат.

„Разговорите за свесност за телото се најраните разговори што родителите можат да ги водат со малите деца за да ги поддржат нивното здравје и безбедност“, објаснува едукаторката Мелиса Карнегеј, која тврди дека токму разговорите за деловите од телото и автономијата на телото се основа за разбирање на согласноста и сексуалното недолично однесување.

За да им помогнат на родителите подобро да ја разберат важноста на овие разговори, едукаторките Мелиса Карнеџи и Лидија М. Бауерс ги објасниле за Huffpost најдобрите начини за поттикнување теми за интимните делови и телесната автономија кај децата.

Користете ги точните зборови за интимните делови од телото

„Делови од телото се само делови од телото. Родителите честопати без двоумење користат соодветни зборови за делови од телото, како што се лактите, колената или носот, па зошто интимните делови од телото да бидат исклучок?“ вели Бауерс, нагласувајќи дека пенисот, тестисите, вулвата и вагината не се лоши зборови и дека родителите не треба да ги избегнуваат и наместо тоа да користат некои други изрази.

Постојат неколку причини зошто децата треба да ги научат точните зборови за интимните делови од телото. На пример, правилната употреба на јазикот и контекстот им помага на децата јасно да комуницираат кога станува збор за нивните тела.

„Ова е важно повторно во контекст на тоа да можат да му објаснат на лекар или на родителите што точно ги боли или ги чеша. Кога избегнуваме одредени зборови, всушност влеваме чувство на срам, нешто што треба да се избегнува или крие”, објаснуваат тие, додавајќи дека употребата на соодветни изрази е корисна за учење на децата како да ги одржуваат своите тела чисти и здрави.

Избегнувајте да користите „слатки“ прекари
Иако е примамливо да се користат еуфемизми и таканаречени „слатки“ прекари кога се зборува со мали деца за нивното тело, тоа може да доведе до проблеми, предупредуваат едукаторките.

„Еден од најголемите проблеми е фактот што има толку многу алтернативни термини и многу од нив имаат различни значења. Ова може да биде ризично бидејќи детето може да биде погрешно разбрано, особено ако доживеало некаква форма на сексуална злоупотреба што треба да се пријави. “ објаснува Карнегеј.