Децата како алатки за одмазда по разводот

Рaзводот не е лесен, но начинот на кој родителите се справуваат со него може да има големо влијание врз нивните деца. За жал, многу родители несвесно ги користат децата како средство за одмазда кон својот поранешен партнер, што на долг рок им штети на децата и на семејните односи.

Разведените родители треба да се фокусираат на благосостојбата на детето, но тие често паѓаат во замката на саботирање на бившите поради чувството на повреденост. Тоа никому не му прави добро.

Ова се некои од најчестите начини на кои разведените родители несвесно ги користат децата за одмазда.

Користење на зборот „твој/а“ со презир
Речениците од типот: „Ох, така рече мајка ти?“ или „Татко ти никогаш не прави ништо како што треба“, се полни со презирен тон. Децата го чувствуваат вашиот гнев кон поранешниот партнер како личен товар.

Наместо децата да развиваат здрав однос со двајцата родители, ваквиот говор ја поткопува нивната самодоверба и емоционалната стабилност.

Според истражувањето во Journal of the American Board of Family Practice, негативните разговори за поранешниот партнер може сериозно да го загрозат односот родител-дете.

Озборување на бившиот пред вашите деца
Без разлика колку е лош родител вашиот поранешен, децата треба сами да го откријат тоа. Постојаното истакнување на грешките од минатото создава чувство на несигурност кај децата.

Како што објаснува експертката за односи Ен Папајоти, децата сакаат да гледаат родители кои комуницираат со почит и ја задржуваат одговорноста за своите емоции.

Спречување контакт со бившиот
Намерното непочитување на договорените термини со другиот родител само за да го повредите, е всушност најштетно за вашите деца. На децата им требаат двајцата родители за да се чувствуваат безбедно и сакано. Со саботирање на односите со бившиот, вие всушност им ја ускратувате можноста на вашите деца за здрав емоционален развој.

Користење на децата како гласници

Испраќањето пораки на бившиот преку вашите деца ги става во непријатна положба. Децата не треба да бидат „посредници“ меѓу родителите. Ако имате проблеми со комуникацијата, користете пораки или е-пошта, но избегнувајте да ги вклучувате децата во вашите конфликти.

Саботирање на бившиот за да излезе дека сте подобар родител
Натпреварот кој е подобар родител им штети на децата. Купувањето подароци или намерното отежнување на работите за бившиот, само заради лично задоволство, испраќа лоша порака до децата – ги учите на манипулација и ривалство.

Лелекање за бившиот пред вашите деца

Децата не треба да слушаат за вашите финансиски проблеми или емоционалната болка предизвикана од вашиот поранешен. Таквото однесување ги оптоварува и ги принудува да преземат одговорност за работи кои не се нивни.

Споредување на децата со бившиот
Фрази како: „Ист си како татко ти/мајка ти!“ често не се комплименти.

Децата знаат дека таквите изјави доаѓаат од место на фрустрација и огорченост, што само ги учи да мислат лошо за себе.